Soltústik Qazaqstan oblysynda internet-alaiaqtar meditsinalyq mekeme qyzmetkerleriniń atyn jamylyp, turǵyndardy aldaýdyń jańa tásiline kóshken. Qaskóiler skrining pen meditsinalyq taldaýlardy syltaý etip, azamattardyń SMS-kodtaryn iemdenedi. Qazirdiń ózinde 40-qa jýyq turǵyn zardap shekken, dep habarlaidy ult.kz.
Polisia.kz málimetinshe, alaiaqtar azamattarǵa telefon shalyp, skriningten nemese fliýorografiiadan ótý qajettigin aityp, elektrondy kezekke tirkeýdi usynady. Ol úshin SMS arqyly kelgen rastaý kodyn suraidy.
Kodty alǵan soń, bank nemese quqyq qorǵaý organdarynyń qyzmetkeri bolyp qaita habarlasyp, azamattyń atyna nesie rásimdelip jatqanyn aitady. Aqshany «qorǵaý» úshin ony qaýipsiz shotqa aýdarýǵa kóndiredi. Alaida bul – qarajatty iemdenýdiń kezekti alaiaqtyq shemasy.
SQO PD bastyǵynyń birinshi orynbasary Álibek Qujahmetovtiń aitýynsha, kei jaǵdaida qylmyskerler azamattardyń qandai meditsinalyq taldaýlar tapsyrǵanyna deiin bilip otyrǵan. Sondyqtan turǵyndarǵa meditsinalyq mekeme atynan qońyraý túskende, aqparatty resmi nómir arqyly tekserý usynylady.
Politsiia jyl basynan beri óńirde internet-alaiaqtyqtyń 443 deregi tirkelgenin habarlady. Bul ótken jyldyń sáikes kezeńimen salystyrǵanda shamamen 30 paiyzǵa az.
Quqyq qorǵaý organdary turǵyndarǵa SMS-kodtardy, bank derekterin jáne jeke málimetterdi bógde adamdarǵa bermeýdi eskertedi.
