Atyraýdaǵy bazarlardyń birinde nikab kigen eki áiel TikTok jelisinde tikelei efirge shyǵyp, terrorizmge qatysy baryn jáne UQK qyzmetkerlerimen bailanysy bar ekenin aitqan. Olardyń málimdemesi áleýmettik jelide qyzý talqylanyp jatyr, dep habarlaidy ult.kz.
Áleýmettik jelide taraǵan videoda áielderdiń parfiýmeriia satyp otyryp, túrli málimdeme jasaǵany kórinedi.
Tikelei efir kezinde áielderdiń biri ózin 20 jyldan beri terrorist ekenin aityp, tiisti tizimde turǵanyn málimdegen. Tipti sol tizimde birinshi bolyp tirkelgenin aitqan.
Sondai-aq olar Ulttyq qaýipsizdik komitetiniń departamentine kún saiyn baryp turatynyn jáne mekeme ǵimaratynyń mańynda turatynyn jetkizgen. Budan bólek, UQK qyzmetkerlerimen tanys ekenin jáne olarmen jaqsy qarym-qatynasta ekenin aitqan.
Efir barysynda nikab kiiý máselesi de sóz bolǵan. Bir kezde áielderdiń biri betin ashqanymen, ekinshisi oǵan qaita jabynýdy talap etip, nikab kiiýge ózi májbúrlegenin aitqan. Al ekinshi áiel betin tek tikelei efir kezinde ǵana jabatynyn, kúndelikti ómirde ashyq júretinin túsindirgen.
Transliatsiia kórermenderi áielderge Qazaqstandaǵy qoǵamdyq oryndarda betti tanýǵa kedergi keltiretin kiim kiiýge qatysty tyiym týraly da suraq qoiǵan.
Video áleýmettik jelide qyzý talqyǵa túsip, qoldanýshylar quzyrly organdardan áielderdiń málimdemelerin tekserip, quqyqtyq baǵa berýdi talap etken.
Politsiia ne deidi?
Atyraý oblystyq politsiia departamenti tikelei efirge qatysqan áielderdiń jeke basy anyqtalǵanyn habarlady. Olardyń jasy – 38 jáne 39-da.
Vedomstvo málimetinshe, eki áiel de politsiia basqarmasyna jetkizilgen.
Atalǵan derekter boiynsha olarǵa qatysty úsh ákimshilik is qozǵalǵan. Atap aitqanda, usaq buzaqylyq, quqyqqa qaishy kontent taratý jáne qoǵamdyq oryndarda adamnyń jeke basyn anyqtaýǵa kedergi keltiretin kiim kiiý faktileri boiynsha materialdar sotqa joldanǵan.
Sonymen qatar áieldermen teologtyń qatysýymen profilaktikalyq áńgime júrgizilgen. Olarǵa zań talaptary, qoǵamdyq tártip normalary jáne quqyq buzýshylyqqa jol bermeý jóninde túsindirý jumystary júrgizilgen.
Politsiia áleýmettik jeli zań talaptary qoldanylmaityn keńistik emes ekenin eske saldy. Vedomstvo ókilderi tikelei efir kezinde jasalǵan quqyqqa qaishy áreketterge de zań aiasynda baǵa berilip, kináliler jaýapqa tartylatynyn atap ótti.
