Qazaqstan men Úndistan qylmystyq jaýapkershilikke tartý nemese sot úkimin oryndatý úshin izdeýde júrgen adamdardy ustap berý týraly kelisimge keldi. Eki el arasyndaǵy tiisti shartqa Bas prokýror Berik Asylov pen Úndistannyń Qazaqstandaǵy elshisi Silas Tangal qol qoidy, dep habarlaidy ult.kz.
Qujatqa qol qoiý rásimi búgin Bas prokýratýrada ótti. Jańa shart eki memlekettiń quqyq qorǵaý organdaryna qylmys jasady degen kúdikpen izdestirilip jatqan nemese sot úkimin oryndaýdan jaltaryp júrgen adamdardy ustap berýge quqyqtyq negiz qalyptastyrady.
Bas prokýratýranyń málimetinshe, kelisim qylmys jasaǵan adamnyń jazadan jaltarýyna jol bermeýge jáne jaýapkershiliktiń bultartpastyǵyn qamtamasyz etýge baǵyttalǵan.
Bul qujat Qazaqstan men Úndistan arasyndaǵy qylmystyq-quqyqtyq yntymaqtastyqtyń sharttyq negizin tolyqtyrady. Buǵan deiin eki memleket qylmystyq ister boiynsha ózara quqyqtyq kómek kórsetý jáne sottalǵan adamdardy berý týraly kelisimderdi qoldanysqa engizgen.
Bas prokýrordyń aitýynsha, jańa shart eki el arasyndaǵy saýda-ekonomikalyq jáne mádeni-gýmanitarlyq bailanystardyń qarqyndy damýy jaǵdaiynda erekshe mańyzǵa ie.
Qazir Qazaqstanda farmatsevtika, taý-ken óndirisi, meditsina jáne tamaq ónerkásibi salalarynda 600-den astam úndi kompaniiasy jumys isteidi. Sonymen qatar Úndistan Qazaqstanda bilim alyp jatqan sheteldik stýdentter sany boiynsha birinshi orynda tur. Máselen, 2025–2026 oqý jylynda elimizde 10 myńǵa jýyq úndistandyq stýdent bilim alǵan.
Sońǵy jyldary eki el azamattarynyń, sonyń ishinde týristerdiń ózara saparlary da kóbeigen. Osyǵan bailanysty memleketaralyq bailanystardy nyǵaitýmen qatar, transshekaralyq qylmysqa qarsy kúreste de birlesken jumysty kúsheitý qajettiligi týyndap otyr.
