Qazaqstan birqatar azyq-túlik túri boiynsha ishki naryqtaǵy suranystyń jartysyn da otandyq ónim esebinen ótei almai otyr. Ásirese óńdelgen kókónister, qant, shai men kofe boiynsha importqa táýeldilik joǵary, dep habarlaidy ult.kz LS-ke silteme jasap.
Ulttyq statistika biýrosy málimetinshe, 2026 jyldyń qańtar-tamyz ailarynda otandyq kásiporyndar óńdelgen jáne konservilengen kókóniske degen ishki suranystyń nebári 16,6 paiyzyn qamtamasyz etken.
Qai ónimder boiynsha importqa táýeldilik joǵary?
- Óńdelgen jáne konservilengen kókónis – 16,6%;
- Qant – 22,3%;
- Shai men kofe – 27,6%;
- Ashytqy – 28,3%;
- Qoiýlandyrylǵan sút pen kilegei – 36%;
- Shokolad jáne shokolad ónimderi – 38,9%.
Iaǵni bul ónimderge degen suranystyń basym bóligi shetelden jetkiziletin taýarlar esebinen óteledi.
Qai ónimder boiynsha otandyq óndiristiń úlesi basym?
Birqatar azyq-túlik túrinen Qazaqstan ishki naryq suranysynyń jartysynan astamyn óz óndirisi arqyly qamtamasyz etip otyr.
Máselen:
- Balyq jáne teńiz ónimderi – 51,5%;
- Tuzdyqtar men dámdeýishter – 56,1%;
- Pechene, keptirilgen nan jáne vafli – 58,6%;
- Irimshik pen súzbe – 59,2%;
- Shujyq ónimderi – 67%.
Al makaron ónimderi boiynsha otandyq óndiristiń úlesi 78,4 paiyzǵa, ósimdik maiy 85,4 paiyzǵa, et pen et ónimderi 86,4 paiyzǵa jetken.
Qai ónimnen Qazaqstan ózin tolyq derlik qamtamasyz etedi?
Ulttyq statistika biýrosynyń deregine súiensek, keibir negizgi azyq-túlik túrinen ishki suranys otandyq ónim esebinen tolyqqa jýyq óteledi.
Atap aitqanda:
- Balmuzdaq – 88,2%;
- Alkogolsiz sýsyndar men sý – 88,7%;
- Jarma – 93,9%;
- Sút pen kilegei – 95,2%;
- Jumyrtqa – 97,5%;
- Un – 99,2%.
Osylaisha, Qazaqstan un, jumyrtqa, sút jáne jarma siiaqty ónimder boiynsha ishki suranysty negizinen óz óndirisi esebinen óteidi. Alaida óńdelgen kókónis, qant, shai, kofe jáne shokolad ónimderine kelgende importqa táýeldilik áli de joǵary.
