Qazaqstanda segiz iri investitsiialyq joba sheńberinde meditsinalyq preparattardyń 494 ataýyn óndirýdi jolǵa qoiý josparlanýda. Olardy júzege asyrý otandyq dári-dármekter shyǵarýdy keńeitýge, 1 200-den astam jumys ornyn ashýǵa jáne eldiń dárilik qaýipsizdigin nyǵaitýǵa múmkindik beredi. Bul týraly QR Úkimetiniń otyrysynda densaýlyq saqtaý ministri Aqmaral Álnazarova málimdedi, dep habarlaidy ult.kz.
Densaýlyq saqtaý ministrligi jasaǵan segiz investitsiialyq joba boiynsha kelisimderdiń jalpy somasy $862 mln-dy quraidy. Óndiris kezeń-kezeńimen igeriletin bolady: dári-dármekterdiń alǵashqy 300 ataýyn 2027-2030 jyldary shyǵarý josparlanýda.
Otandyq farmatsevtika ónerkásibi turaqty ósýdi kórsetýde. 2025 jyldyń qorytyndysy boiynsha qazaqstandyq dári-dármekterdi óndirý kólemi 37%-ǵa artty. 2026 jyldyń segiz aiynda 157 mlrd teńgege ónim óndirildi, bul ótken jyldyń sáikes kezeńiniń kórsetkishinen 30%-ǵa artyq. Sońǵy 2 jylda salaǵa salynǵan investitsiialar kólemi 3,3 esege, al eksport 1,9 esege ósti.
Eksportqa joldanatyn negizgi memleketter qataryna Resei, Qyrǵyzstan, Ózbekstan, Monǵoliia, Moldava kirdi. Otandyq farmatsevtikalyq ónimniń halyqaralyq naryqtarǵa shyǵýynyń bir mysaly Shymkentte óndirilgen qant diabetin emdeýge arnalǵan dárilik preparatynyń birinshi partiiasyn Bolgariiaǵa jetkizý boldy.
Salany odan ári damytý úshin Ministrlik óndirýshilermen uzaqmerzimdi sharttardy keńeitýdi jáne otandyq ónimdi satyp alý tetikterin jetildirýdi jalǵastyrady. Jańa jobalardy júzege asyrý eldiń óndiristik bazasyn nyǵaitýǵa jáne qazaqstandyq óndiristegi dári-dármekter assortimentin keńeitýge múmkindik beredi.
