Qazaqstanda 3 qarashadan bastap áielderge arnalǵan «Umai» ipotekalyq baǵdarlamasyna ótinim qabyldaý bastaldy. Bul joly baǵdarlamaǵa Aziia damý banki bólgen 20 mlrd teńge kólemindegi ekinshi transh baǵyttalyp otyr. Alǵashqy 9 mlrd teńgelik qarjy 2026 jylǵy 31 tamyzda nebári jeti saǵat ishinde tolyq igerilgen bolatyn, dep habarlaidy ult.kz.
«Umai» baǵdarlamasynyń negizgi talaptary ózgergen joq. Áielder turǵyn úi satyp alý úshin 50 mln teńgege deiin, al baspana jóndeýge 15 mln teńgege deiin nesie rásimdei alady.
Jyldyq paiyzdyq mólsherleme – 14,8 paiyz. Jyldyq tiimdi syiaqy mólsherlemesi (JTSM) 16,3–16,8 paiyz aralyǵynda. Bastapqy jarna iri qalalarda 20 paiyzdan, óńirlerde 15 paiyzdan bastalady.
Baǵdarlamaǵa qatysý úshin otbasynyń ailyq tabysy 1 mln 250 myń teńgeden aspaýy kerek. Sonymen qatar ótinish berýshi sońǵy alty aidaǵy tólem qabilettiligin rastaýǵa jáne satyp alǵan nemese jóndegen turǵyn úide turýǵa mindetti.
Bank tabys kózi retinde jalaqyny ǵana emes, zeinetaqyny, shákirtaqyny, kásipkerlik qyzmetten túsetin kiristi jáne basqa da turaqty tólemderdi esepke alady. Qajet bolǵan jaǵdaida qosalqy qaryz alýshyny tartýǵa múmkindik bar.
Alǵashqy transh kezinde ótinim qabyldaý saitynda tehnikalyq irkilister týyndap, kóptegen áiel onlain tirkelýde qiyndyqqa tap bolǵan edi. Bul joly «Otbasy bank» ótinim berýdiń úsh tásilin usyndy:
- Bank keńesshisi arqyly: mamandar tólem qabilettiligin aldyn ala baǵalap, qujattardy rásimdeýge kómektesedi;
- Onlain: «Beine-qyzmet kórsetý» servisi arqyly operatordyń kómegimen ótinim berýge bolady;
- Bank bólimshesinde: qujattardy tikelei tapsyrýǵa múmkindik bar.
Aita keteiik, alǵashqy transhtyń qysqa ýaqyt ishinde taýsylýy baǵdarlamaǵa degen suranystyń joǵary ekenin kórsetti. Sondyqtan baspana alýdy josparlaǵan áielderge nesie talaptaryn aldyn ala zerdelep, qajetti qujattaryn daiyndap qoiǵany jón.
