Almatyda qyzmettik mindetin atqarý kezinde qaza tapqan politseilerdiń jesirleri áleýmettik tólemderdiń azaiǵanyna shaǵymdandy. Áielderdiń aitýynsha, qaita esepteýden keiin keibir otbasylarǵa nebári 98 teńge jáne 1 880 teńge kóleminde tólem taǵaiyndalǵan. Buǵan deiin aýdarylǵan qarajat ta «artyq tólem» dep tanylǵan. Almaty qalalyq politsiia departamenti jaǵdaiǵa qatysty túsinikteme berdi, dep habarlaidy ult.kz.
Tengrinews.kz málimetinshe, jesir áieldiń aitýynsha, qaza tapqan politseilerdiń otbasylary 2023 jyldan beri marqum qyzmetkerdiń jalaqysynyń 40 paiyzy mólsherinde ár otbasy múshesine tólenetin qarajatty alýǵa tyrysyp keledi. 2026 jyly tólemder bastalǵanymen, birneshe aidan keiin olar qaita eseptelip, buryn aýdarylǵan aqsha artyq tólem retinde kórsetilgen.
«Kúieýlerimiz sol kezde qaza tapty. Biraq olardyń áielderi men balalary búgin ómir súrip jatyr. Biz azyq-túlik satyp alamyz, oqý aqysyn, emdelýdi jáne kúndelikti turmystyq shyǵyndardy tóleimiz», – dedi ol beineúndeýinde.
Al Almaty qalalyq politsiia departamenti tólemderdi esepteý tártibine ózgerister engizý jobasy ázirlengenin habarlady. Jańa erejeler boiynsha tólemder qyzmetkerlerdiń qazirgi aqshalai úlesine qarai eseptelip, ol ósken jaǵdaida qaita qaralady.
Vedomstvonyń málimetinshe, qujat qoǵamdyq talqylaý men saraptamadan ótip, qazir memlekettik organdarmen kelisilip jatyr.
Sondai-aq politsiia jesirlerden buryn aýdarylǵan qarajatty qaitarýdy talap etý sharalary qabyldanbaitynyn málimdedi. Másele túpkilikti sheshilgenge deiin artyq tólemdi qaitarý boiynsha eshqandai áreket jasalmaidy.
