Jambyl oblysynda joǵarǵy synyp oqýshysy soqqyǵa jyqqan jasóspirim komaǵa tústi. Balanyń jansaqtaý bóliminde jatqanyna ekinshi táýlik boldy. Onyń miy men ókpesi isingen, dep habarlaidy ult.kz.
KTK arnasynyń málimetinshe, 14 jastaǵy jasóspirim aýdandyq aýrýhanaǵa senbi kúni keshke túsken. Kýágerlerdiń aitýynsha, ony sol jerge basqa balalar alyp kelgen. Oqýshynyń júregi toqtap qalǵan, alaida dárigerler ony qaita soqtyra aldy.
"Naýqastyń jaǵdaiy óte aýyr, turaqsyz kúide qalyp otyr. Ol medikamentozdy komada, ókpeni jasandy jeldetý apparatyna qosylǵan. Qazirgi ýaqytta tolyq kólemde qarqyndy terapiia júrgizilip jatyr. Jaǵdaiyna bailanysty qalaǵa tasymaldaýǵa ázirge bolmaidy", - dep habarlady Jambyl aýdandyq ortalyq aýrýhanasy bas dárigeriniń orynbasary Nurmahan Máýlenov.
Oqiǵa Birlesý-Eńbek aýylyndaǵy klýbtyń janynda bolǵany anyqtalǵan. 11-synyp oqýshysy 9-synyp oqýshysynyń keýde tusyna birneshe soqqy jasaǵan delinedi. Aýylda álimjettik týraly aitylyp jatyr.
Bolǵan jaǵdaiǵa bailanysty politsiia jaýap berdi.
"Atalǵan derek boiynsha politsiia qylmystyq is qozǵady. Oqiǵaǵa qatysýshylardyń barlyǵy ustalyp, politsiiaǵa jetkizildi. Aldyn ala málimet boiynsha, burynnan tanys eki kámeletke tolmaǵan balanyń arasynda janjal shyǵyp, sonyń barysynda bireýi ekinshisine soqqy jasaǵan", - dedi Jambyl oblystyq PD bastyǵynyń orynbasary Áset Ospanov.
