Qaraǵandy oblystyq soty elektr berý jelisindegi apatty joiý kezinde aýyr dene jaraqatyn alyp, keiinnen I top múgedektigi belgilengen elektrmonterine 30% kiná taǵýdy negizsiz dep tanydy, dep habarlaidy ult.kz Joǵarǵy sot telegram arnasyna silteme jasap.
Elektr monteri brigada quramynda elektr berý jelisinde apattyq-qalpyna keltirý jumystaryn júrgizgen. Jumys barysynda jelige kerneý berilýi saldarynan jazataiym oqiǵa oryn alyp, qyzmetker aýyr dene jaraqatyn alǵan. Keiin oǵan I top múgedektigi belgilengen.
Arnaiy tergep-tekserý komissiiasy jumys berýshiniń kinásin 70%, al qyzmetkerdiń kinásin 30% dep anyqtaǵan.
Komissiianyń qorytyndysymen kelispegen jábirlenýshi sotqa júginip, qaýipsizdik sharalarynyń saqtalǵanyn, al qaýipsiz eńbek jaǵdailaryn qamtamasyz etý jumys berýshiniń mindeti ekenin kórsetken.
Birinshi satydaǵy sot qyzmetkerdiń áreketinen óreskel abaisyzdyq belgilerin baiqap, talap qoiýdy qanaǵattandyrýdan bas tartqan.
Alaida apelliatsiialyq saty brigadanyń jumys júrgizýge jiberilgenin, al jerge tuiyqtaý qurylǵysy kerneýdiń joqtyǵy tekserilgennen keiin ornatylǵanyn anyqtady.
Sot jumystardy uiymdastyrý jáne olardyń qaýipsiz júrgizilýi úshin jaýapkershilik jumys berýshiniń ýákiletti tulǵalaryna júkteletinin atap ótti.
Sonymen qatar komissiia elektrmonteriniń áreketterinde óreskel abaisyzdyq bolǵanyn jáne onyń áreketteri men týyndaǵan zardaptar arasynda sebep-saldarlyq bailanystyń bar ekenin dáleldei almaǵan.
Sot jazataiym oqiǵa jumys berýshiniń qaýipsiz eńbek jaǵdailaryn tiisinshe uiymdastyrmaýy, onyń ishinde jumystar júrgizilip jatqan kezde elektr jelisine kerneý berilýine jol bermeý sharalaryn qabyldamaýy saldarynan bolǵan degen qorytyndyǵa keldi.
Nátijesinde Qaraǵandy oblystyq soty talap qoiýdy qanaǵattandyryp, arnaiy tergep-tekserý aktisinen qyzmetkerdiń 30% kinási týraly qorytyndyny alyp tastady.
Sot aktisi zańdy kúshine endi.
