Алматыда қызметтік міндетін атқару кезінде қаза тапқан полицейлердің жесірлері әлеуметтік төлемдердің азайғанына шағымданды. Әйелдердің айтуынша, қайта есептеуден кейін кейбір отбасыларға небәрі 98 теңге және 1 880 теңге көлемінде төлем тағайындалған. Бұған дейін аударылған қаражат та «артық төлем» деп танылған. Алматы қалалық полиция департаменті жағдайға қатысты түсініктеме берді, деп хабарлайды ult.kz.
Tengrinews.kz мәліметінше, жесір әйелдің айтуынша, қаза тапқан полицейлердің отбасылары 2023 жылдан бері марқұм қызметкердің жалақысының 40 пайызы мөлшерінде әр отбасы мүшесіне төленетін қаражатты алуға тырысып келеді. 2026 жылы төлемдер басталғанымен, бірнеше айдан кейін олар қайта есептеліп, бұрын аударылған ақша артық төлем ретінде көрсетілген.
«Күйеулеріміз сол кезде қаза тапты. Бірақ олардың әйелдері мен балалары бүгін өмір сүріп жатыр. Біз азық-түлік сатып аламыз, оқу ақысын, емделуді және күнделікті тұрмыстық шығындарды төлейміз», – деді ол бейнеүндеуінде.
Ал Алматы қалалық полиция департаменті төлемдерді есептеу тәртібіне өзгерістер енгізу жобасы әзірленгенін хабарлады. Жаңа ережелер бойынша төлемдер қызметкерлердің қазіргі ақшалай үлесіне қарай есептеліп, ол өскен жағдайда қайта қаралады.
Ведомствоның мәліметінше, құжат қоғамдық талқылау мен сараптамадан өтіп, қазір мемлекеттік органдармен келісіліп жатыр.
Сондай-ақ полиция жесірлерден бұрын аударылған қаражатты қайтаруды талап ету шаралары қабылданбайтынын мәлімдеді. Мәселе түпкілікті шешілгенге дейін артық төлемді қайтару бойынша ешқандай әрекет жасалмайды.
