Qazaqstandyq tanymal akter, kaskader, model ári kásipker Oljas Toǵymbet Stan.kz-ke bergen suhbatynda jeke ómirine qatysty syryn ashty. Óner iesi ózinen jasy úlken áieldiń qarjylai qamtamasyz etýdi usynǵanyn aityp, bul jaǵdaidan keiin modeldik mansabyn toqtatýǵa sheshim qabyldaǵanyn jetkizdi, dep habarlaidy ult.kz.
Suhbat barysynda jýrnalist akterden osydan birneshe jyl buryn aitqan áńgimesi týraly surady. Atap aitqanda, júrgizýshi ózinen úlken áielderdiń ony asyraýǵa usynys jasaǵany jónindegi sózin eske saldy.
Oljas Toǵymbettiń aitýynsha, oqiǵa shamamen 10 jyl buryn, model bolyp jumys istep júrgen kezinde bolǵan. Akter mundai usynysty múlde kútpegenin jáne ony qabyldai almaǵanyn jasyrmady.
"Ol 10 jyl buryn model bolyp júrgen kezde boldy. Aityp ketkendei, Shymkenttiń jigiti bolǵandyqtan, ol nárse maǵan jat kórindi. Sol usynys túskende denem titirkenip ketti. Telefonyn berdi, habarlas, jaǵdaiyńdy jasap alasyń dep. Men ol kezde balalardy kútip turǵanmyn. Sodan keiin modeldikten ketip, frilanser bolyp kettim. Ózimmen-ózim jumys jasaǵan durys dep sheshtim", – dedi akter.
Alaida Oljas Toǵymbet bul oqiǵany jaýapsyz qaldyrmaǵan. Birneshe kún ótken soń usynys jasaǵan áielmen arnaiy kezdesip, óziniń ustanymyn ashyq jetkizgen.
"Men er azamat bolǵannan keiin, birneshe kúnnen keiin ol kisimen kezdestim. Bul nárseniń maǵan jat ekenin aittym. Durys emestigin túsindirdim. Dos retinde aralasaiyq. Ini retinde kómek, demeýshilik kerek bolsa degen siiaqty. Men jas bala emespin, túsinigim basqa. Qazaqtyń naǵyz jigitimin dep bárin túsindirdim. Bireýdiń berekesin qalai alamyn? Er azamat jetistikke ózi jetý kerek dedim. Sosyn ol kisi meni syilaǵannan ketti", – dep eske aldy óner iesi.
Akterdiń sózinshe, bul áńgimeniń sońy túrli qaýesetke ulasqan. Degenmen ol jurttyń pikiri ózine áser etpegenin aitty.
"Biraq sonyń ózinde ósek ketti. Maǵan báribir dedim, bastysy, men Qudaidyń, ózimniń aldymda tazamyn", – dep túiindedi Oljas Toǵymbet.
Osylaisha akter qarjylyq qoldaýdan góri óz eńbegimen jetistikke jetýdi tańdaǵanyn jetkizdi
