Búgin Semeide daryndy balalarǵa arnalǵan jańa oblystyq mamandandyrylǵan «Bilim-innovatsiia» litseiiniń irgetasyn qalaý rásimi ótti. Saltanatty sharaǵa oblys ákimi Berik Ýáli, «Bilim-Innovatsiia» halyqaralyq qoǵamdyq qorynyń prezidenti Darhan Óte qatysty, dep habarlaidy ult.kz.
Aimaq basshysy quttyqtaý sózinde jańa bilim ordasynyń óńir úshin mańyzy erekshe ekenin atap ótti.
«Búgin biz oblysymyzdyń bilim berý júiesi úshin airyqsha mańyzǵa ie tarihi sáttiń kýási bolyp otyrmyz. Qaraǵaily turǵyn aýdanynda daryndy balalarǵa arnalǵan jańa oblystyq mamandandyrylǵan «Bilim-Innovatsiia» litseiiniń irgetasyn qalaý rásimi – óńirimizdiń bilim salasyndaǵy jarqyn bolashaqqa baǵyttalǵan mańyzdy qadam. Memleket basshysy Qasym-Jomart Kemeluly Toqaev Qazaqstan halqyna arnaǵan Joldaýynda bilim men ǵylymdy damytý, adami kapitaldy nyǵaitý, jas urpaqtyń ziiatkerlik áleýetin arttyrý el damýynyń strategiialyq basymdyqtary ekenin únemi atap ótip keledi. Prezident aiqyndaǵan osy mindetter aiasynda búgingi qolǵa alynyp otyrǵan igi bastamanyń mańyzy erekshe. Óitkeni, mektep salý – ǵimarat turǵyzý ǵana emes, ol – eldiń erteńine, jas urpaqtyń bilimi men bolashaǵyna salynǵan investitsiia dep bilemiz. Jobanyń taǵy bir mańyzdy qyry – jańa ǵimarat paidalanýǵa berilgennen keiin qazirgi litsei ornalasqan ǵimaratty kúrdeli jóndeýden ótkizip, qyz balalarǵa arnalǵan mamandandyrylǵan litsei retinde ashýdy josparlap otyrmyz. Osylaisha, búgingi qurylys eki birdei igi maqsatqa jol ashady: birinshiden, uldar men qyzdarǵa arnalǵan bilim berý baǵyttaryn damytýǵa múmkindik beredi; ekinshiden, óńirdegi daryndy balalardyń sapaly bilim alýyna qoljetimdilikti arttyrady. Búgin qalanyp jatqan irgetas – erteńgi úlken jetistikterdiń bastaýy. Osy igi iske atsalysyp otyrǵan barsha azamattarǵa shynaiy alǵysymdy bildiremin», – dedi Berik Ýáli.
Daryndy balalarǵa arnalǵan mamandandyrylǵan bilim berý uiymdaryna suranystyń artýyna bailanysty 400 oryndyq jańa litseidiń qurylysy qolǵa alyndy. Ǵimarat janynan 300 oqýshyǵa arnalǵan jataqhana salynady. Joba quny – 6,8 mlrd teńge. Nysan 4,7 gektar jer ýchaskesinde ornalasady. Ǵimarat úsh qabattan turady. Jobada matematika, fizika, himiia, biologiia, informatika jáne robototehnika pánderine arnalǵan oqý kabinetteri, jaratylystaný baǵytyndaǵy zerthanalar men zamanaýi IT synyptary qarastyrylǵan.
Sonymen qatar, munda shyǵarmashylyq úiirmelerge arnalǵan bólmeler, sport zaly, ashana, kitaphana, májilis zaly jáne meditsinalyq kabinet bolady. Ǵimarat aýmaǵynda demalys oryndary, kógaldandyrý aimaqtary, jaiaý júrginshiler joldary men avtoturaq salý kózdelgen.
Jańa bilim ordasynyń irgetasyn qalaý rásiminde sóz sóilegen ustazdar men ata-analar óz rizashylyqtaryn jetkizdi.
«32 jyl buryn dál osy kúni qazirgi «Bilim-Innovatsiia» litseii ashylǵan bolatyn. Basynda 100 bala qabyldanǵan edi. Oqýshylar sany jyldan jylǵa ósip keledi. Búgingi kúni bizdiń túlekterimiz tórtkúl dúnieniń ár túkpirinde júr. Jańa ǵimarattyń irgetasy qalanyp, qurylys jumysy bastalǵanyna dán rizamyz. Barsha ustazdardyń, ata-analardyń, turǵyndardyń jáne túlekterdiń atynan alǵys aitamyz», – dedi ardager ustaz Kenjehan Nakishev.
Semeidegi «Bilim-Innovatsiia» litseii 1994 jyly qurylǵan. Osy kezeńde litsei kóptegen daryndy oqýshyny tárbielep, olardyń respýblikalyq jáne halyqaralyq deńgeide bilimin kórsetýine múmkindik berdi. Litsei oqýshylary birneshe jyl qatarynan oblystyq «Úzdik olimpiadalyq komanda» ataǵyn ielenip, pándik olimpiadalarda joǵary nátije kórsetip keledi.
Qazirgi ýaqytta litsei 1981 jyly salynǵan ǵimaratta ornalasqan. Nysannyń jobalyq qýattylyǵy 140 oryn bolǵanymen, munda 224 oqýshy bilim alýda. Litseige degen suranys jyl saiyn artyp keledi.
Búginde Abai oblysynda 304 memlekettik mektep jumys isteidi. Onda 100 myńǵa jýyq bala bilim alýda. Óńirde oqýshy oryndarynyń tapshylyǵy 6,3 myńdy quraidy. Onyń 4,3 myńy Semei qalasyna tiesili. Bul máseleni sheshý maqsatynda «Keleshek mektebi» ulttyq jobasy aiasynda oblysta 5 jańa mektep paidalanýǵa berildi. Semei qalasyndaǵy Qaraǵaily shaǵyn aýdanynda 1400 oryndyq BINOM mektebiniń qurylysy bastaldy. Sonymen qatar, «Abaiǵa qurmet» aktsiiasy aiasynda Astana qalasy Semeide 1500 oryndyq mektep salýdy josparlap otyr. Budan bólek Jarma aýdanynyń Sýyqbulaq aýylyndaǵy 100 oryndyq mekteptiń qurylysy aiaqtalýǵa jaqyn. Sondai-aq, Aqsýat aýdanynyń Aqsýat aýylynda memlekettik-jekeshelik áriptestik tetigi arqyly 300 oqýshyǵa arnalǵan jańa mekteptiń qurylysy bastalady.
