4 qarashada Qazaqstannyń birqatar óńirinde qolaisyz meteorologiialyq jaǵdailar boljanady. Kei jerlerde tuman túsip, jeldiń ekpini 15-20 m/s-qa deiin jetedi. Sonymen qatar birneshe oblysta úsik, jańbyr, qar jáne kóktaiǵaq bolýy múmkin. Bul týraly «Qazgidromet» RMK habarlady, dep jazady ult.kz.
Sinoptikterdiń málimetinshe, Túrkistan oblysynyń taýly aýdandarynda kúndiz kei ýaqyttarda qatty jańbyr jaýady. Túnde jáne tańerteń tuman túsedi. Taýly aimaqtarda ońtústik-shyǵystan soqqan jeldiń ekpini 15-20 m/s-qa deiin jetýi yqtimal.
Almaty oblysynyń shyǵysy men taýly aýdandarynda soltústik-shyǵystan soǵatyn jeldiń ekpini 15-20 m/s bolady. Túnde oblystyń soltústiginde 4 gradýsqa deiin úsik júredi. Jetisý oblysynda da túnde aýa temperatýrasy 2-7 gradýsqa deiin tómendeidi. Alakól kólderi aýdanynda jeldiń ekpini 15-20 m/s-qa jetedi. Taldyqorǵanda túnde 4-6 gradýs úsik kútiledi.
Shyǵys Qazaqstan oblysynyń shyǵysy men taýly aýdandarynda túnde qar jaýyp, kóktaiǵaq bolady. Al Soltústik Qazaqstan, Aqmola, Pavlodar, Qaraǵandy, Ulytaý, Abai, Qostanai jáne Batys Qazaqstan oblystarynyń kei jerlerinde túnde jáne tańerteń tuman túsedi.
Jambyl oblysynyń taýly aýdandarynda da tuman boljanady. Munda soltústik-shyǵystan soǵatyn jeldiń ekpini 15-20 m/s-qa deiin kúsheiedi. Mańǵystaý oblysynyń batysynda kúndiz ońtústik-shyǵystan soǵatyn jeldiń ekpini 15-20 m/s bolady.
Budan bólek, birqatar óńirde órt qaýpi joǵary deńgeide saqtalady. Shymkent, Almaty, Taldyqorǵan, Túrkistan, Taraz, Qonaev jáne Aqtaý qalalarynda joǵary órt qaýpi bar.
Qyzylorda, Atyraý qalalarynda jáne Aqtóbe oblysynyń birqatar bóliginde tótenshe órt qaýpi saqtalady. Sondai-aq Jetisý oblysynyń shyǵysynda, Qyzylorda oblysynda jáne Ulytaý oblysynyń batysy men ortalyǵynda tótenshe órt qaýpi jariialanǵan.
