Tanymal ánshi Tóreǵali Tóreáliniń 33 jasqa tolýyna orai uiymdastyrylǵan "Tore show" kontserttik jobasyna qatysqan azamattar eńbekaqylaryn ala almai júrgenderin aityp, narazylyq bildirdi. Olardyń sózinshe, arada bir jyl ótse de, atqarǵan jumystary úshin tiesili qarajat tolyq tólenbegen, dep habarlaidy ult.kz.
Astana turǵyny Rýslan Tashbaev elimizdiń birneshe qalasynda ótken kontsertterdi uiymdastyrýǵa jáne ótkizýge atsalysqanyn aitady. Alaida onyń sózinshe, joba aiaqtalǵannan keiin eńbeginiń aqysy tolyq berilmegen.
Rýslan bul máselege tap bolǵan jalǵyz ózi emes ekenin jetkizdi. Onyń aitýynsha, Nazi esimdi áriptesi de kelisilgen qarajatyn ala almai júr. Ekeýi prodiýserlik ortalyqqa birneshe márte habarlasqanymen, tólemniń qashan jasalatyny jóninde naqty jaýap estimegen.
"Ókinishke qarai, Tore show úshin tólenýi tiis aqshamdy tolyq ala almadym. Men ǵana emes, Nazi esimdi áriptesim de eńbekaqysyn alǵan joq. Qazir ekeýmiz de istegen jumysymyzdyń aqysyn alý úshin kúresip júrmiz. Bul máseleni sheshý maqsatynda prodiýserlik ortalyqqa talai habarlasyp kelemiz. Alaida naqty jaýap ala almai otyrmyz. Aqshanyń qashan tólenetini belgisiz, eshkim naqty merzim aitpaidy", – dedi Rýslan Tashbaev.
Ol qarjylyq kelispeýshiliktiń taǵy bir sebebin de atady. Aitýynsha, bastapqyda aýyzsha kelisilgen eńbekaqy mólsheri keiin usynylǵan kelisimsharttaǵy somadan ózgeshe bolǵan. Degenmen qujatta jazylǵan qarajattyń ózi de osy ýaqytqa deiin tolyq tólenbepti.
Rýslan Tashbaev másele ózara kelisim arqyly sheshilmese, quqyǵyn qorǵaý úshin sotqa júginýge nietti ekenin aitty.
Al KTK jýrnalisteri jaǵdaiǵa qatysty túsinikteme alý úshin prodiýser Jan Muqanovpen bailanysqan. Alaida ol resmi suhbat berýden bas tartyp, aitylǵan aiyptaýlardy joqqa shyǵarǵan. Sondai-aq eńbekaqysyn talap etip júrgen azamattardy tanymaitynyn málimdegen.
Ázirge taraptar arasyndaǵy qarjylyq daýdyń qalai sheshiletini belgisiz. Eńbekaqy tólenbegeni týraly málimet shaǵymdanýshylardyń sózine negizdelgen, al prodiýser bul aqparatpen kelispeidi.
