Reseilik bloger Roman Zýbenko Germaniiada ótken Dimash Qudaibergenniń kontsertine qatysty pikir bildirip, ánshiniń kórermendermen orys tilinde amandaspaǵanyna kóńili tolmaǵanyn jetkizdi. Onyń bul sózi áleýmettik jelide qyzý talqyǵa tústi, dep habarlaidy ult.kz.
Roman Zýbenko Germaniianyń Diýsseldorf qalasynda uiymdastyrylǵan Dimash Qudaibergenniń kontsertine otbasymen birge barǵan. Bloger qazaqstandyq ánshiniń erekshe daýysyn, sahnadaǵy sheberligin jáne kontserttiń uiymdastyrylý deńgeiin joǵary baǵalaǵan. Degenmen kesh barysynda orys tilindegi ánderdiń az oryndalǵanyna narazylyq bildirgen.
Onyń aitýynsha, kontsert zalyna jinalǵandardyń basym bóligi orys tilinde sóileitin kórermender bolǵan. Sondyqtan bloger Dimashtyń oryssha ánderdi kóbirek oryndaitynyn kútken. Alaida kontsertte bul tilde bir ǵana shyǵarma shyrqalǵan.
"Ol mundaǵy kórermenderdiń orys tildi ekenin bildi ǵoi. Qazaqsha amandasty ma, joq pa, bilmeimin. Menińshe, kontsertin tek aǵylshyn tilinde bastady. Qazaqsha amandasqanyna senimdi emespin, biraq oryssha eshkimmen amandaspaǵany anyq. Amandasýyna bolar edi ǵoi", – dedi Roman Zýbenko.
Bloger ánshiniń mundai áreketin orys tildi tyńdarmandarǵa jetkilikti kóńil bólmeý dep qabyldaǵan. Sondai-aq kontsertte oryssha bir ǵana án aitylatynyn aldyn ala bilgen adamdardyń keibiri bilet alýdan bas tartýy múmkin ekenin alǵa tartty.
Alaida onyń bul pikiri jeli qoldanýshylaryna unamady. Kópshilik Dimashtyń tek belgili bir eldiń nemese tildiń aýditoriiasyna emes, álemniń túkpir-túkpirindegi tyńdarmandaryna óner kórsetetin halyqaralyq deńgeidegi ánshi ekenin eske saldy.
Jeli qoldanýshylarynyń biri álemdik juldyzdardyń ózge memleketterde kontsert bergende sol eldiń tilinde án aitýǵa mindetti emes ekenin aityp, Djennifer Lopestiń Qazaqstandaǵy óner kórsetýin mysalǵa keltirgen.
"Dimashtyń álemdik juldyz ekenin ózińiz de moiyndadyńyz. Álemge tanymal kóptegen ánshi tek ana tilinde án aitady. Mysaly, jaqynda Djennifer Lopes Qazaqstanǵa keldi. Biraq birde-bir ánin oryssha da, qazaqsha da oryndaǵan joq. Eshkim renjigen joq qoi. Al Dimash bir kontsertinde altydan astam tilde án shyrqaidy. Bul onyń barsha tyńdarmanyna degen qurmeti emes pe?" – dep jazdy pikir qaldyrýshylardyń biri.
Soǵan qaramastan, Roman Zýbenko kontsertten erekshe áser alǵanyn jasyrmaǵan. Ol Dimashtyń vokaldyq múmkindigin joǵary baǵalap, mundai deńgeidegi ónerdi tamashalaý úshin bilet baǵasy úsh ese qymbat bolsa da, qarajat aiaýǵa bolmaitynyn aitqan.
Aita keteiik, Dimash Qudaibergen búginde DIMENSIONS atty álemdik kontserttik týrnesin jalǵastyryp júr. Dimash News málimetinshe, bul joba ánshiniń vokaldyq sheberligin ǵana emes, kompozitorlyq jáne prodiýserlik qyryn da kópshilikke tanystyrýǵa baǵyttalǵan. Týr aiasynda óner iesi túrli tildegi shyǵarmalaryn oryndap, halyqaralyq aýditoriiamen júzdesip keledi.
