Biraz ýaqyttan beri kópshilik aldyna shyqpai ketken ánshi ári akter Qairat Túntekov áleýmettik jelidegi paraqshasynda jazba jariialap, ómirindegi qiyn kezeńder týraly aitty. Óner iesi sahnadan alystaǵanymen, shyǵarmashylyqtan birjola qol úzbegenin jetkizdi, dep habarlaidy ult.kz.
Ánshi sońǵy jyldary basynan túrli jaǵdai ótkenin jasyrmady. Onyń sózinshe, qýanyshty kúndermen qatar, aýyr sátter de az bolmaǵan. Tipti kei kezderi bárin artqa tastap, el kózinen tasada qalýdy oilaǵan.
Degenmen qandai qiyndyqqa tap bolsa da, án men sahnadan túbegeili bas tarta almaǵanyn aitty. Óitkeni óner onyń ómirinde erekshe oryn alady.
"Basymnan talai jaǵdai ótti. Qýanysh ta boldy, qiyndyq ta boldy. Keide bárin tastap, únsiz qalǵym kelgen sátter de az emes. Biraq ónerden birjola kete almadym. Óitkeni án – meniń ómirimniń bir bólshegi. Sahna – meniń ornym. Al sizderdiń qoldaýlaryńyz maǵan árdaiym kúsh beredi", – dep jazdy Qairat Túntekov.
Óner iesi tyńdarmandarynyń yqylasy men qoldaýy ózine jiger beretinin de atap ótti. Onyń bul jazbasynan shyǵarmashylyq jolyn jalǵastyrýǵa nietti ekenin baiqaýǵa bolady.
Ánshiniń uzaq úzilisten keiingi úndeýi áleýmettik jeli qoldanýshylarynyń nazaryn aýdardy. Jankúierleri óner iesine jyly lebizderin bildirip, onyń qaitadan sahnaǵa shyǵýyn kútetinderin jazyp jatyr. Degenmen Qairat Túntekov aldaǵy shyǵarmashylyq josparlary men jańa týyndylary týraly ázirge naqty málimet jariialaǵan joq.
Qairat Túntekov kim?
Qairat Túntekov – qazaqstandyq estrada ánshisi, halyqaralyq mýzykalyq baiqaýlardyń jeńimpazy. Ol 1986 jyly 14 aqpanda Shymkent qalasynda dúniege kelgen.
Bala kezinen mýzykaǵa qyzyǵyp, mektep qabyrǵasynda horda án aitqan. 2000 jyly 14 jasynda halyqaralyq "Boztorǵai" baiqaýyna qatysyp, Gran-pri ielengen. T. Júrgenov atyndaǵy Qazaq ulttyq óner akademiiasynda "Estradalyq vokal" mamandyǵy boiynsha bilim alǵan.
2005 jyly "SuperStar KZ" mýzykalyq jobasynyń ekinshi maýsymynda jeńiske jetip, kópshilikke keńinen tanyldy.
2010 jyly Latviianyń Iýrmala qalasynda ótken "Jańa tolqyn" halyqaralyq án baiqaýynda tórtinshi oryn aldy.
2017 jyly "Singer Kazakhstan" mýzykalyq jobasynyń jeńimpazy atandy.
2024 jyly bergen suhbatynda shyǵarmashylyq toqyraýdy bastan ótkergenin jáne Shymkentke kóship barǵanyn aitqan. Sondai-aq ánshi qyzynyń bar ekenin, onyń da mýzykaǵa qabiletti ekenin alǵash ret kópshilikke jetkizgen
