Біраз уақыттан бері көпшілік алдына шықпай кеткен әнші әрі актер Қайрат Түнтеков әлеуметтік желідегі парақшасында жазба жариялап, өміріндегі қиын кезеңдер туралы айтты. Өнер иесі сахнадан алыстағанымен, шығармашылықтан біржола қол үзбегенін жеткізді, деп хабарлайды ult.kz.
Әнші соңғы жылдары басынан түрлі жағдай өткенін жасырмады. Оның сөзінше, қуанышты күндермен қатар, ауыр сәттер де аз болмаған. Тіпті кей кездері бәрін артқа тастап, ел көзінен тасада қалуды ойлаған.
Дегенмен қандай қиындыққа тап болса да, ән мен сахнадан түбегейлі бас тарта алмағанын айтты. Өйткені өнер оның өмірінде ерекше орын алады.
"Басымнан талай жағдай өтті. Қуаныш та болды, қиындық та болды. Кейде бәрін тастап, үнсіз қалғым келген сәттер де аз емес. Бірақ өнерден біржола кете алмадым. Өйткені ән – менің өмірімнің бір бөлшегі. Сахна – менің орным. Ал сіздердің қолдауларыңыз маған әрдайым күш береді", – деп жазды Қайрат Түнтеков.
Өнер иесі тыңдармандарының ықыласы мен қолдауы өзіне жігер беретінін де атап өтті. Оның бұл жазбасынан шығармашылық жолын жалғастыруға ниетті екенін байқауға болады.
Әншінің ұзақ үзілістен кейінгі үндеуі әлеуметтік желі қолданушыларының назарын аударды. Жанкүйерлері өнер иесіне жылы лебіздерін білдіріп, оның қайтадан сахнаға шығуын күтетіндерін жазып жатыр. Дегенмен Қайрат Түнтеков алдағы шығармашылық жоспарлары мен жаңа туындылары туралы әзірге нақты мәлімет жариялаған жоқ.
Қайрат Түнтеков кім?
Қайрат Түнтеков – қазақстандық эстрада әншісі, халықаралық музыкалық байқаулардың жеңімпазы. Ол 1986 жылы 14 ақпанда Шымкент қаласында дүниеге келген.
Бала кезінен музыкаға қызығып, мектеп қабырғасында хорда ән айтқан. 2000 жылы 14 жасында халықаралық "Бозторғай" байқауына қатысып, Гран-при иеленген. Т. Жүргенов атындағы Қазақ ұлттық өнер академиясында "Эстрадалық вокал" мамандығы бойынша білім алған.
2005 жылы "SuperStar KZ" музыкалық жобасының екінші маусымында жеңіске жетіп, көпшілікке кеңінен танылды.
2010 жылы Латвияның Юрмала қаласында өткен "Жаңа толқын" халықаралық ән байқауында төртінші орын алды.
2017 жылы "Singer Kazakhstan" музыкалық жобасының жеңімпазы атанды.
2024 жылы берген сұхбатында шығармашылық тоқырауды бастан өткергенін және Шымкентке көшіп барғанын айтқан. Сондай-ақ әнші қызының бар екенін, оның да музыкаға қабілетті екенін алғаш рет көпшілікке жеткізген
