بٸراز ۋاقىتتان بەرٸ كٶپشٸلٸك الدىنا شىقپاي كەتكەن ەنشٸ ەرٸ اكتەر قايرات تٷنتەكوۆ ەلەۋمەتتٸك جەلٸدەگٸ پاراقشاسىندا جازبا جارييالاپ, ٶمٸرٸندەگٸ قيىن كەزەڭدەر تۋرالى ايتتى. ٶنەر يەسٸ ساحنادان الىستاعانىمەن, شىعارماشىلىقتان بٸرجولا قول ٷزبەگەنٸن جەتكٸزدٸ, دەپ حابارلايدى ult.kz.
ەنشٸ سوڭعى جىلدارى باسىنان تٷرلٸ جاعداي ٶتكەنٸن جاسىرمادى. ونىڭ سٶزٸنشە, قۋانىشتى كٷندەرمەن قاتار, اۋىر سەتتەر دە از بولماعان. تٸپتٸ كەي كەزدەرٸ بەرٸن ارتقا تاستاپ, ەل كٶزٸنەن تاسادا قالۋدى ويلاعان.
دەگەنمەن قانداي قيىندىققا تاپ بولسا دا, ەن مەن ساحنادان تٷبەگەيلٸ باس تارتا الماعانىن ايتتى. ٶيتكەنٸ ٶنەر ونىڭ ٶمٸرٸندە ەرەكشە ورىن الادى.
"باسىمنان تالاي جاعداي ٶتتٸ. قۋانىش تا بولدى, قيىندىق تا بولدى. كەيدە بەرٸن تاستاپ, ٷنسٸز قالعىم كەلگەن سەتتەر دە از ەمەس. بٸراق ٶنەردەن بٸرجولا كەتە المادىم. ٶيتكەنٸ ەن – مەنٸڭ ٶمٸرٸمنٸڭ بٸر بٶلشەگٸ. ساحنا – مەنٸڭ ورنىم. ال سٸزدەردٸڭ قولداۋلارىڭىز ماعان ەردايىم كٷش بەرەدٸ", – دەپ جازدى قايرات تٷنتەكوۆ.
ٶنەر يەسٸ تىڭدارماندارىنىڭ ىقىلاسى مەن قولداۋى ٶزٸنە جٸگەر بەرەتٸنٸن دە اتاپ ٶتتٸ. ونىڭ بۇل جازباسىنان شىعارماشىلىق جولىن جالعاستىرۋعا نيەتتٸ ەكەنٸن بايقاۋعا بولادى.
ەنشٸنٸڭ ۇزاق ٷزٸلٸستەن كەيٸنگٸ ٷندەۋٸ ەلەۋمەتتٸك جەلٸ قولدانۋشىلارىنىڭ نازارىن اۋداردى. جانكٷيەرلەرٸ ٶنەر يەسٸنە جىلى لەبٸزدەرٸن بٸلدٸرٸپ, ونىڭ قايتادان ساحناعا شىعۋىن كٷتەتٸندەرٸن جازىپ جاتىر. دەگەنمەن قايرات تٷنتەكوۆ الداعى شىعارماشىلىق جوسپارلارى مەن جاڭا تۋىندىلارى تۋرالى ەزٸرگە ناقتى مەلٸمەت جارييالاعان جوق.
قايرات تٷنتەكوۆ كٸم?
قايرات تٷنتەكوۆ – قازاقستاندىق ەسترادا ەنشٸسٸ, حالىقارالىق مۋزىكالىق بايقاۋلاردىڭ جەڭٸمپازى. ول 1986 جىلى 14 اقپاندا شىمكەنت قالاسىندا دٷنيەگە كەلگەن.
بالا كەزٸنەن مۋزىكاعا قىزىعىپ, مەكتەپ قابىرعاسىندا حوردا ەن ايتقان. 2000 جىلى 14 جاسىندا حالىقارالىق "بوزتورعاي" بايقاۋىنا قاتىسىپ, گران-پري يەلەنگەن. ت. جٷرگەنوۆ اتىنداعى قازاق ۇلتتىق ٶنەر اكادەميياسىندا "ەسترادالىق ۆوكال" ماماندىعى بويىنشا بٸلٸم العان.
2005 جىلى "SuperStar KZ" مۋزىكالىق جوباسىنىڭ ەكٸنشٸ ماۋسىمىندا جەڭٸسكە جەتٸپ, كٶپشٸلٸككە كەڭٸنەن تانىلدى.
2010 جىلى لاتۆييانىڭ يۋرمالا قالاسىندا ٶتكەن "جاڭا تولقىن" حالىقارالىق ەن بايقاۋىندا تٶرتٸنشٸ ورىن الدى.
2017 جىلى "Singer Kazakhstan" مۋزىكالىق جوباسىنىڭ جەڭٸمپازى اتاندى.
2024 جىلى بەرگەن سۇحباتىندا شىعارماشىلىق توقىراۋدى باستان ٶتكەرگەنٸن جەنە شىمكەنتكە كٶشٸپ بارعانىن ايتقان. سونداي-اق ەنشٸ قىزىنىڭ بار ەكەنٸن, ونىڭ دا مۋزىكاعا قابٸلەتتٸ ەكەنٸن العاش رەت كٶپشٸلٸككە جەتكٸزگەن
