Almatylyq Asylym Ótepbergen “Qazaq arýy – 2026” baiqaýynyń jeńimpazy atandy. Ol onlain daýys berýde 17 myńnan astam daýys jinaǵan, dep habarlaidy ult.kz.

Baiqaý 3 qarashada Almatydaǵy Respýblika saraiynda ótti. Ekinshi nómirmen óner kórsetken Asylymǵa jeńimpaz tájimen birge Aida Kaýmenova sán úii arnaiy tikken shapan jáne shetelge joldama tabystaldy.

Biyl uiymdastyrýshylar sahnalyq baǵdarlamany ózgeshe usyndy. Qatysýshylar jeke óner kórsetýdiń ornyna, “Qyz Jibek” qoiylymynda bas qosyp, ortaq óner kórsetti. Al suraq-jaýap kezeńinde 22 úmitkerge saýaldardy kinoda Qyz Jibek beinesin somdaǵan aktrisa Merýert Ótekeshova qoidy.

Defile kezinde byltyrǵy jeńimpaz Dariia Qýatjannyń sán úii ázirlegen kóilekter tanystyryldy.

Baiqaý jeńimpazy osymen úshinshi jyl qatarynan halyqtyń onlain daýys berýi arqyly anyqtalyp otyr.

Aita keteiik, Baian Alagózova Móldir Áýelbekovaǵa shúilikti.

Baian Alagózova kim?

Baian Maqsatqyzy Alagózova – qazaqstandyq prodiýser, aktrisa jáne telejúrgizýshi. Ol 1974 jylǵy 9 qańtarda Oral qalasynda dúniege kelgen. Ónerli otbasynda ósken: ákesi Maqsat Muhitdenov – dybys rejisseri, anasy Gúljamal Muhitdenova – aktrisa. Baian 1993 jyly “Mahabbat beketi” filmindegi basty róli arqyly kópshilikke tanyldy. Keiin telearnalarda tilshi jáne júrgizýshi bolyp jumys istedi. 2006 jyldan bastap “KeshYOU” tobyna prodiýserlik etip, otandyq shoý-bizneste keńinen tanyla bastady. Buryn jurtshylyqqa Baian Esentaeva esimimen belgili bolǵan. 

Onyń shyǵarmashylyq qyzmeti mýzykamen shektelmeidi. Baian Alagózovanyń Shine Production kompaniiasy “Ǵashyq júrek”, “Ǵashyq júrek 2”, “Abailańyz, siyr!” filmderin jáne “Mahabbatym júregimde”, “Ógei júrek”, “Qazaq arýy” sekildi telehikaialardy túsirgen.

Sondai-aq ol ulttyq “Qazaq arýy” sulýlyq baiqaýynyń bastamashysy retinde tanymal.