Баян Алагөзова экс-шәкірті Мөлдір Әуелбекованың жазбасына шүйлікті, деп хабарлайды ult.kz.

Мөлдір Әуелбекова оқырманының жазбасына, ұстаздарымен татуласпайтынын айтып “Құдай сақтасын, беті аулақ” деп жазған. 

Баян осы жауапқа шүйлікті. 

«Сен менің ең жақсы шәкіртім болдың! Мен саған басқалардың бәріне қарағанда әлдеқайда көп нәрсе бердім. Бірақ Құдай ар-ұят таратып жатқанда, саған ештеңе тимеген сияқты», - деді ол. 

Бағым Мұхитденова не дейді? 

Дәл осы жауапқа қатысты Бағым Мұхитденова пікір білдіріп, әлеуметтік желідегі парақшасында үнсіз жүргенінің себебін түсіндіріп, әншінің сөзіне реніш білдірді.

Продюсер Бағым Мұхитденова әнші Мөлдір Әуелбекованың бүгінгі танымалдылығына өзінің де үлесі бар екенін айтып, өткенді ұмытпауға шақырды.

Оның айтуынша, Мөлдір Әуелбекова Құдайға шүкіршілік етумен қатар, оған қолдау көрсеткен адамға да алғыс білдіруі керек. Продюсер әншінің қазақ сахнасына шығуына жол ашқанын еске салып, қазіргі жетістігін тек өз еңбегімен келгендей көрсетуіне наразылығын білдірді.

Бағым Мұхитденова әншімен арадағы бұрынғы қарым-қатынасына қатысты да ренішін жасырмады. Оның сөзінше, Мөлдір Әуелбекова бір кездері продюсердің үйінде тұрған. Алайда кейін олардың арасында түсініспеушілік болып, Мұхитденова мұны сатқындық ретінде қабылдаған.

Продюсер сонымен бірге әншінің жолдасының назарына қатысты жағдай мен қаржы мәселесіне де тоқталды. Оның мәлімдеуінше, бұл жағдай оған және ұлына тиесілі қаражатқа байланысты болған.

Бұдан бөлек, Бағым Мұхитденова Мөлдір Әуелбекованың әлеуметтік желіде өзін жәбірленуші ретінде көрсетуіне қарсылық білдірді. Продюсер осы жылдар бойы өз басындағы қиындықтарды сыртқа шығармай, іште сақтап келгенін атап өтті.

Ол әншіге енді бұл мәселеде өзін құрбан ретінде көрсетпеуге және Мұхитденованың отбасына қатысты пікір білдірмеуге шақырды. Продюсер өз тарапынан да бұл тақырыпты әрі қарай қозғамайтынын аңғартты.

Мөлдір Әуелбекова кім?

Мөлдір Әуелбекова – қазақ эстрадасында өзіндік орны бар әнші. Ол актриса әрі тележүргізуші ретінде де танылған. Өнер иесі 1986 жылғы 10 тамызда Тараз қаласында дүниеге келген.

Мөлдірдің өнерге деген қызығушылығы бала кезінен басталған. Кейін музыка бағытында білім алып, Темірбек Жүргенов атындағы Қазақ ұлттық өнер академиясында оқуын жалғастырған. Ол аталған оқу орнында эстрада өнері бойынша магистр дәрежесін алған.

Әншінің есімі көпшілікке «SuperStar KZ» жобасынан кейін кеңінен таныла бастады. Мөлдір Әуелбекова 2004 жылы байқаудың екінші маусымына қатысып, үздік ондықтың қатарына енді. Жоба оның кәсіби сахнадағы алғашқы қадамдарының бірі болды.

Кейін өнер иесі сол кездегі танымал «КешYou» қыздар тобының құрамында өнер көрсетті. Топпен бірге бірнеше ән орындап, тыңдарманға танылды. Біраз уақыттан соң Мөлдір Әуелбекова жеке шығармашылық жолға түсіп, жеке әндерін ұсына бастады.

Ол жылдар ішінде қазақ эстрадасында жеке орындаушы ретінде де қалыптасып, түрлі музыкалық жобалар мен сахналық қойылымдарға қатысты.