Tanymal prodiýser Áliia Qudaibergenova qazaq kinosynyń ańyz aktrisasy Merýert Ótekeshova týraly áserli jazba jariialady. Ol óner iesiniń basynan ótken aýyr taǵdyryna qaramastan, sabyrly qalpynan tanbaǵanyn aityp, aktrisaǵa degen erekshe qurmetin bildirdi, dep habarlaidy ult.kz.
Prodiýser Instagram paraqshasynda Merýert Ótekeshovamen birge túsken sýretin jariialap, aktrisanyń syrtqy sulýlyǵymen qatar, jan dúniesiniń tazalyǵyna tánti ekenin jetkizgen.
"Arý dese arý ǵoi! Tabiǵat syilaǵan sulýlyqtyń syny da, syry da ketpeidi. Merýert apaimen estelikke sýretke tústim. Paraqshamda tursyn dedim. Apaidyń júzi ǵana sulý emes, jany da sulý. Jany sulý, jany kórkem bolmasa anadai aspandap turǵan ataqqa qylaý túsirmei alyp júre alar ma edi?!", – dep jazdy ol.
Áliia Qudaibergenova aktrisanyń ómirindegi eń aýyr kezeńderdiń birine de toqtalǵan. Onyń sózinshe, jalǵyz ulynan aiyrylý Merýert Ótekeshova úshin orny tolmas qaiǵy bolǵanymen, ol ómirdiń qiyndyqtaryna moiymai, sabyr saqtai bilgen.
"Jalǵyz ulynan aiyrylý degeniń ǵumyrlyq qaiǵy ǵoi… Bárine asa úlken sabyrmen, táýbemen qarady. Syrbaz, sulý, pań qalpyn joǵaltyp almady. Sulý, meiirimdi júzin ashynyspen bylǵamady. Janyn kirletpedi. Bylǵanbady", – deidi prodiýser.
Sondai-aq ol aktrisanyń qarapaiymdylyǵy men kishipeiildiligin erekshe atap ótken. Prodiýserdiń pikirinshe, Merýert Ótekeshova elge tanymal bolǵanyna qaramastan, eshqashan ataǵyn alǵa tartyp, ózgelerden ózin joǵary qoimaǵan.
"Qyz Jibek bolmai-aq tutas elge mindet artatyndar qanshama, Qudai-aý! Onyń janynda bul kisi bir perishte keiiptegi adam ǵoi! Uzaaq jasańyz!", – dep jazbasyn aiaqtaǵan ol.
Jeli qoldanýshylary ne deidi?
Prodiýserdiń júrekjardy jazbasy áleýmettik jeli qoldanýshylaryn da beijai qaldyrmaǵan. Oqyrmandar Merýert Ótekeshovanyń sulýlyǵy men adamgershiligin dáriptep, Áliia Qudaibergenovanyń jazý mánerine de joǵary baǵa bergen.
"Qalai kórkem tilmen óte saýatty bolmysty ashyp, tereń túsindirdińiz. Jazý mánerińiz qatty unady. Ásirese, ashynǵanmen bylǵamady degeni óte tereń, kóp sulýǵa oi saldyńyz", – dep jazǵan oqyrmandardyń biri.
Taǵy bir jeli qoldanýshysy aktrisany qazaq sulýlyǵynyń simvolyna balaǵan.
"Qandai ádemi, kórkem jazasyz! Sizdi sol úshin jaqsy kóremin. Sizdi "Juldyzdar otbasy" kezinen oqimyn. Qazaq tarihynda máńgi qalatyn sulýlyqtyń simvoly – Qyz Jibek", – dep pikir qaldyrǵan ol.
Jeli qoldanýshylarynyń kópshiligi aktrisaǵa uzaq ǵumyr tilep, onyń qazaq kino ónerindegi orny erekshe ekenin atap ótken.
