2027 jyly Qurban aittyń alǵashqy kúni jeksenbige sáikes keledi. Alaida kelesi dúisenbi, 17 mamyr, qazaqstandyqtar úshin jumys kúni bolyp qalady. Sebebi dini merekege bailanysty demalys kúni avtomatty túrde aýystyrylmaidy, dep habarlaidy ult.kz.
Qazaqstan musylmandary dini basqarmasy 2027 jylǵy dini merekeler kúntizbesin bekitti. Oǵan sáikes, Qurban ait 16-18 mamyr aralyǵynda ótedi. Al Eńbek kodeksine sáikes, merekeniń tek alǵashqy kúni ǵana demalys bolyp sanalady.
Nelikten demalys kúni aýystyrylmaidy?
Qurban ait memlekettik jáne ulttyq merekeler qataryna jatpaidy. Sondyqtan onyń alǵashqy kúni jeksenbige sáikes kelgen jaǵdaida demalys kelesi jumys kúnine kóshirilmeidi.
QR Eńbek kodeksiniń 84-babyna sáikes, Qurban aittyń alǵashqy kúni jumys rejimine qaramastan demalys kúni bolyp esepteledi. Biraq ony dúisenbige aýystyrý qarastyrylmaǵan.
2027 jylǵy dini merekeler kúntizbesi:
- 8 aqpan – Ramazan aiynyń bastalýy;
- 5-nen 6 naýryzǵa qaraǵan tún – Qadir túni;
- 9 naýryz – Oraza ait;
- 15 mamyr – Arapa kúni;
- 16-18 mamyr – Qurban ait.
Osylaisha, bes kúndik jumys aptasynda 9 naýryz, 17 jáne 18 mamyr ádettegi jumys kúnderi bolady.
Qurban aittyń alǵashqy kúni jumys istegenderge qalai aqy tólenedi?
Eger qyzmetker 16 mamyrda jumysqa shyqsa, oǵan ótemaqy qarastyrylǵan. Eńbek kodeksiniń 85 jáne 109-baptaryna sáikes, qyzmetker basqa demalys kúnin alýǵa nemese eńbekaqysynyń keminde bir jarym eselengen mólsherde tólenýin tańdaýǵa quqyly.
Mysaly, bir kúndik eńbekaqysy 20 myń teńge bolsa, mereke kúni jumys istegeni úshin keminde 30 myń teńge tólenýi kerek.
Aýysymdyq nemese vahtalyq jumys kestesimen isteitin qyzmetkerlerdi bul kúni jumysqa tartý úshin bólek jazbasha kelisim talap etilmeidi. Al basqa qyzmetkerlerge qatysty zańda belgilengen talaptar saqtalýy tiis.
Qurban aittyń kúni ózgerýi múmkin be?
QMDB málimetinshe, dini merekelerdiń naqty kúni jańa aidyń kórinýine bailanysty bir kúnge ózgerýi múmkin.
Eger Qurban aittyń alǵashqy kúni 17 mamyrǵa aýyssa, dúisenbi demalys bolady. Al mereke 15 mamyrda bastalsa, senbi demalys kúni bolyp esepteledi.
