Almaty qalasynda 21-24 qazan kúnderi aralyǵynda IV Halyqaralyq «Almaty Puppet Festival – 2026» qýyrshaq teatrlar festivali ótti. Almaty qalasy ákimdiginiń qoldaýymen Memlekettik akademiialyq qýyrshaq teatry uiymdastyrǵan festivalge 11 elden 14 teatr ujymy, 150-den astam qýyrshaq sheberleri qatysty, dep habarlaidy ult.kz.
2023 jyly bastaý alǵan halyqaralyq kezdesý biyl tórtinshi márte ótkizildi. Festival Túrkiia, Resei, Italiia, Frantsiia, Iran, Moldova, Ázirbaijan, Grýziia, Ózbekstan, Qyrǵyzstan jáne Qazaqstan teatrlaryn biriktirdi. Elimizden Astana, Qostanai jáne Jetisai qalalarynyń ujymdary óner kórsetti.
Tórt kúndik baǵdarlama kórermenderdi túrli elderdiń ulttyq sahnalyq dástúrlerimen, qýyrshaqty júrgizý tásilderimen jáne rejisserlik sheshimderimen tanystyrdy. Teatr mamandary shyǵarmashylyq tájiribesimen bólisip, spektaklder tóńireginde kásibi pikir almasty.
Festival baǵdarlamasynda Irannyń Tegeran qalasynan kelgen «Deemak» teatry «Marshmelloý», Túrkiianyń Ystanbul qalasynan kelgen «Karagóz» teatry «Álem juldyzdarynyń shoýy», Ferǵana oblystyq qýyrshaq teatry (Ózbekstan) «Chemodan», Giandja memlekettik qýyrshaq teatry (Ázirbaijan) «Kot v sapogah» spektaklderin usyndy. Al Musa Jangaziev atyndaǵy Qyrǵyz memlekettik qýyrshaq teatry (Qyrǵyzstan, Bishkek) «Pegii pes, begýshii kraem moria», Tatar memlekettik akademiialyq «Ekiiat» qýyrshaq teatry (Resei, Tatarstan, Kazan) «Adámnár», Astana qalasy ákimdiginiń «Qýyrshaq teatry» «Qaǵazdy jańbyr» spektaklderin sahnalady. Sondai-aq, Moldovanyń Kishinev qalasynan kelgen «Izvorașul Vesel» qýyrshaq teatry «Printsessa Krapinka», Ozýrgeti qalasynyń Aleksandr Tsýtsýnava atyndaǵy kásibi memlekettik drama teatry (Grýziia) «The Dog», al Ekaterinbýrgtiń «Tohot» teatry (Resei) «Zverskii detektiv» spektaklderin kórermen nazaryna usyndy.
Ashylý saltanatynda Memlekettik akademiialyq qýyrshaq teatry robot-qýyrshaqty tanystyrdy. Sahnalyq baǵdarlamaǵa qatysqan erekshe keiipker dástúrli qýyrshaq óneri men zamanaýi tehnologiiany ushtastyrýǵa baǵyttalǵan tájiribe boldy. Qýyrshaqty basqarýdyń jańa múmkindikterin kórkemdik maqsatta qoldaný teatrdyń shyǵarmashylyq izdenisteriniń biri retinde usynyldy.
Qatysýshy teatrlardyń spektaklderin kásibi qazylar alqasy baǵalady. Qazylar alqasynyń tóraǵasy: teatrtanýshy, Qazaqstannyń eńbek sińirgen qairatkeri, professor, M. Áýezov atyndaǵy Qazaq ulttyq drama teatrynyń direktory Erkin Jýasbek. Qazylar quramyna: teatrtanýshy, ónertaný kandidaty, professor, Qazaqstan halyqaralyq teatr synshylary birlestiginiń múshesi Merýert Jaqsylyqova; teatrtanýshy, teatr synshysy, ónertaný kandidaty, dotsent, Zahir Ismaǵilov atyndaǵy Ýfa memlekettik óner institýtynyń Óner tarihy jáne teoriiasy kafedrasynyń meńgerýshisi Aisylý Sagitova; Memlekettik akademiialq qýyrshaq teatrynyń kórkemdik jetekshisi, rejisser, akter Kýbanychbek Adylov kirdi.
Festival qorytyndysy boiynsha Gran-Pri «Úzdik spektakl» júldesin Musa Jangaziev atyndaǵy Qyrǵyz memlekettik qýyrshaq teatry ielendi.
«Úzdik rejisser» nominatsiiasy Tatar memlekettik akademiialyq «Ekiiat» qýyrshaq teatryna; «Úzdik akterlik ansambl» nominatsiiasy Astana qalasy ákimdiginiń «Qýyrshaq teatryna»; «Úzdik qýyrshaq júrgizýshi» nominatsiiasy «Izvorașul Vesel» qýyrshaq teatryna; «Úzdik sýretshi» nominatsiiasy Aleksandr Tsýtsýnava atyndaǵy kásibi memlekettik drama teatryna; «Jańashyl kózqaras» nominatsiiasy «Tohot» teatryna tabystaldy.
IV Halyqaralyq «Almaty Puppet Festival – 2026» túrli teatr mektepteriniń tájiribesin bir sahnada toǵystyrdy. Festival Almaty kórermenine qýyrshaq óneriniń san alýan úlgilerin usynýmen qatar, qatysýshy ujymdardyń kásibi bailanysyn nyǵaitýǵa jáne bir-biriniń shyǵarmashylyq tásilderimen tanysýyna múmkindik berdi.
