Memleket basshysy Qasym-Jomart Toqaev Qazaqstannyń eńbek sińirgen qairatkeri, belgili ánshi Nurlan Ónerbaevty 65 jasqa tolǵan mereitoiymen quttyqtady, dep habarlaidy ult.kz.

Prezident óner iesiniń qazaq mýzykasyn damytýǵa jáne ulttyq mádeni murany nasihattaýǵa qosqan úlesin atap ótti.

Prezidenttiń quttyqtaý hatyn mádeniet jáne aqparat ministri Arman Qyryqbaev Astanada ótken kezdesý barysynda ánshige tabystady.

Quttyqtaý hatynda Memleket basshysy Nurlan Ónerbaevtyń ózindik oryndaýshylyq máneri men qońyr daýysy tyńdarmannyń yqylasyna bólengenin atap ótken.

«Ózińizge tán qońyr daýysyńyz ben erekshe oryndaýshylyq mánerińiz talǵampaz tyńdarmannyń júreginen oryn aldy. Siz dástúr sabaqtastyǵyn saqtap, halyq ánderi men belgili kompozitorlardyń tańdaýly týyndylaryn nasihattaýǵa mol úles qosyp kelesiz. Izdeniske toly shyǵarmashylyq jolyńyz jemisti bolyp, talantty shákirtter tárbieledińiz», – delingen Prezidenttiń quttyqtaýynda.

Aita keteiik, Nurlan Ónerbaeavtyń shańyraǵynan qaiǵyly habar jetti.

Nurlan Ónerbaev kim? 
 

Nurlan Ónerbaev – qazaq estradasynyń belgili ánshisi, akter, Qazaqstannyń eńbek sińirgen ártisi ári eńbek sińirgen qairatkeri. Ol 1961 jyly 4 qarashada qazirgi Túrkistan oblysy Tóle bi aýdanynda dúniege kelgen. Qońyr daýysy men ózindik oryndaý máneri arqyly halyqtyń yqylasyna bólengen óner iesi.

Ánshiniń repertýarynda týǵan jer, ata-ana, mahabbat taqyrybyndaǵy shyǵarmalar men halyq ánderi bar. Tyńdarman ony “Qaraǵym-ai”, “Anashym”, “Qazaq qyzy”, “Saǵyndym aýyldy”, “Jan aǵa” sekildi ánderi arqyly jaqsy tanidy. Onyń oryndaýynda “Dýdarai”, “Sandýǵash”, “Bir bidai arpa” siiaqty halyq ánderi de keń taraǵan.

Nurlan Ónerbaev ónermen qatar, mádeniet pen aqparat salasynda basshylyq qyzmetter atqarǵan. Qazaq radiosynda diktor, keiin bas direktor bolyp jumys istegen. Almaty qalasynyń mádeniet departamentin basqaryp, Qazaqstan Parlamenti Májilisiniń depýtaty bolǵan.