Tanymal akter Oljas Abai jýrnalist Aman Tasyǵanǵa bergen suhbatynda aktrisa Dariǵa Badyqovamen aradaǵy qarym-qatynasynyń qalai bastalǵanyn ashyq aitty. Óner iesi áriptestik bailanystyń birtindep mahabbatqa ulasqanyn jetkizdi, dep habarlaidy ult.kz.
Akterdiń sózinshe, ekeýiniń jaqyndasýyna ortaq jumys sebep bolǵan. Alǵashynda kásibi qarym-qatynas retinde bastalǵan bailanys ýaqyt óte kele ózara qyzyǵýshylyqqa, keiin tereń sezimge ainalǵan.
"Bári ádemi bastaldy, jaqsy bastaldy, júrekpen bastaldy. Birinshi áreketpen, jumyspen bastaldy. Odan keiin jumystyń barysy qyzyǵýshylyqqa aýa bastady. Odan keiin qyzyǵýshylyq túsinistikke ákele bastady. Túsinistik buldyrlaǵan sezimge ákele bastady. Sezim jaýapkershilikke ákele bastady. Jaýapkershilik sheshimge ákeldi. Sosyn bári osyndai bir qýanyshty kúnge ákeldi", – dedi Oljas Abai.
Suhbat barysynda jýrnalist akterden Dariǵa Badyqovany ózine jaqyn adam retinde qashan qabyldaǵanyn da surady.
"Bul meniń adamym degen sheshim qai kezde paida boldy?" degen saýalǵa Oljas Abai "Kino túsirip júrgen ýaqyttarda ǵoi" dep qysqa jaýap qaiyrdy.
Alaida akterdiń mahabbat hikaiasy jeli qoldanýshylarynyń bárine birdei unai qoimaǵan. Suhbattan úzindi taraǵannan keiin áleýmettik jelide túrli pikir jazyldy.
"Ol aqshany kóbirek taba bastady desei", "Ekeýi de otbasylaryna satqyndyq jasady", "Báribir quptamaimyn", "Aqshadan bastaldy", "Kúlkisiniń astynda bir syr bar", "Ertegi aitqandai aityp otyr ǵoi", "Apama jezdem sai", – dep pikir bildirdi jeli qoldanýshylary.
Osylaisha, Oljas Abaidyń Dariǵa Badyqovaǵa degen sezimi qalai oianǵany týraly áńgimesi kópshiliktiń qyzý talqysyna tústi. Biri akterdiń shynaiy sezimin ashyq jetkizgenin quptasa, endi biri olardyń qarym-qatynasyna qatysty syni pikirin bildirdi.
