Qazaqstan Respýblikasy Kólik ministrligi aqyly avtomobil joldarynyń jelisin keńeitýde. Osyǵan bailanysty «Qandyaǵash – Maqat» aqyly jolynyń quramyna «Aqtóbe – Qandyaǵash» avtojolynyń 11-shaqyrymynan 100-shaqyrymyna deiingi qaita jańǵyrtylǵan bóligi engiziledi, dep habarlaidy ult.kz.
Jol júrý aqysy ýchaskelerge qarai ártúrli bolady. Atap aitqanda, 11-shaqyrymnan 87-shaqyrymǵa deiingi aralyqta barlyq kólik túri, sonyń ishinde jeńil avtomobilder úshin de aqy alynady. Al 87-shaqyrymnan 100-shaqyrymǵa deiingi ýchaskede jáne «Qandyaǵash – Maqat» jolynyń qalǵan bóliginde aqy tek avtobýstar men júk avtomobilderinen alynady.
Jol júrý quny júrip ótken qashyqtyqqa, kólik quralynyń sanatyna, júk kótergishtigine jáne tólem tásiline bailanysty belgilenedi. Irgeles aýdandardyń turǵyndaryna jeńildikpen abonementter qarastyrylǵan. Jergilikti turǵyndardyń jeńil avtomobilderine arnalǵan jyldyq abonement quny 1 AEK bolady. Al jergilikti avtobýstar men júk avtomobilderi úshin kólik sanatyna qarai ailyq abonement quny 1-den 5 AEK-ke deiin, jyldyq abonement 12-den 60 AEK-ke deiin belgilenedi.
Jinalǵan qarajattyń barlyǵy jol infraqurylymyn kútip ustaýǵa jáne jóndeýge, sondai-aq arnaiy tehnika satyp alýǵa jumsalady.
Osyǵan bailanysty Qazaqstan Respýblikasy Kólik ministriniń buiryǵyna tiisti ózgerister engizildi. Olar alǵash ret resmi jariialanǵan kúnnen keiin 10 kúntizbelik kún ótken soń kúshine enedi.
