Qazaqstannyń Tótenshe jaǵdailar ministrligi qarasha aiynda bolýy múmkin apatqa bailanysty eshqandai resmi eskertý taratpaǵanyn málimdedi, dep habarlaidy ult.kz.
Sońǵy aptalarda áleýmettik jelilerde túrli elderdiń úkimetteri azamattarǵa azyq-túlik pen sý qoryn jinap, aýqymdy apatqa daiyndalýdy tapsyrǵany týraly aqparat taraǵan. Sonymen qatar 17 qarashada jahandyq kibershabýyl bolyp, bankter men internet jumysy buzylady degen boljamdar da jariialanǵan.
Tengrinews.kz saýalyna jaýap bergen TJM mundai tótenshe jaǵdai týraly resmi eskertý jasalmaǵanyn habarlady.
«Qazirgi ýaqytta ministrlik qarasha aiynda bolýy múmkin qaýipterge nemese tótenshe jaǵdailarǵa bailanysty halyqqa azyq-túlik, sý jáne dári-dármek qoryn shuǵyl jinaý qajettigi týraly resmi eskertý taratqan joq», – delingen vedomstvo jaýabynda.
Nelikten úide úsh kúndik qor bolýy kerek?
Sonymen birge TJM úide keminde úsh táýlikke (72 saǵatqa) jetetin qajetti zattar qoryn ustaý jónindegi usynys bar ekenin rastady. Alaida bul qandai da bir naqty qaýipke bailanysty emes. Bul – jer silkinisi, sý tasqyny siiaqty tótenshe jaǵdailarǵa aldyn ala daiyndyq sharasy.
Ministrlik ár adamǵa táýligine shamamen úsh litr aýyzsý esebinen qor jinaýdy usynady. Mysaly, tórt adamnan turatyn otbasyǵa úsh kúnge 36 litr sý qajet.
Sondai-aq úide uzaq saqtalatyn azyq-túlik, dári-dármek, alǵashqy kómek qobdishasy, qujattar, qolma-qol aqsha, telefon qýattaǵyshtary, paýerbank, qolsham jáne jyly kiim bolǵany jón.
17 qarashada alańdaýǵa negiz bar ma?
TJM jaǵdaidy táýlik boiy baqylap otyrǵanyn jáne basqa memlekettik organdarmen birlesip azamattardyń qaýipsizdigin qamtamasyz etetinin málimdedi.
Vedomstvo qazaqstandyqtardy áleýmettik jelilerdegi tekserilmegen aqparattarǵa senbeýge shaqyrdy. Resmi málimetterdi TJM saitynan, Telegram-daǵy 112 arnasynan jáne ministrliktiń áleýmettik jelilerdegi paraqshalarynan alýǵa bolady.
Tótenshe jaǵdai týyndap, kómek qajet bolsa, 112 nómirine habarlasý kerek.
