Qazaqstanda jolbarystardy qaita jersindirý baǵdarlamasy aiasynda Amýr esimdi atalyq jolbarys tabiǵi ortaǵa jiberildi. Ol «Ile-Balqash» memlekettik tabiǵi rezervatyna shyǵarylǵan ekinshi jolbarys atandy. Bul týraly Ekologiia jáne tabiǵi resýrstar ministrligi málimdedi, dep habarlaidy ult.kz.
Oqiǵa 2026 jylǵy 31 qazanda boldy. Buǵan deiin, 31 shildede, Úmit esimdi analyq jolbarys tabiǵatqa jiberilgen edi. Osylaisha, Qazaqstannyń jabaiy tabiǵatynda 70 jyldan astam ýaqyt bolmaǵan jyrtqyshtar tarihi mekenine qaita orala bastady.
Amýr Qazaqstanǵa jetkizilgennen keiin rezervattaǵy arnaiy beiimdeý qorshaýynda ustaldy. Mamandar onyń densaýlyǵyn, ańshylyq daǵdylaryn, ózdiginen qorek tabý qabiletin jáne adamǵa qatysty minez-qulqyn teksergen. Nátijesinde jolbarystyń jabaiy tabiǵatta ózdiginen tirshilik etýge daiyn ekeni anyqtalǵan.
Endi onyń qozǵalysy men jańa ortaǵa beiimdelýi spýtniktik baqylaý qarǵybaýy arqyly qadaǵalanady.
Ekologiia jáne tabiǵi resýrstar ministri Álibek Qýantyrovtyń aitýynsha, baǵdarlamanyń basty maqsaty – jolbarystardy tarihi mekenine qaitarýmen shektelmei, olardyń tabiǵi ortada ózdiginen tirshilik etip, kóbeie alatyn turaqty popýliatsiiasyn qalyptastyrý.
Aita keteiik, Qazaqstanǵa 2026 jylǵy mamyrda Reseidiń Habarovsk ólkesinen tórt Amýr jolbarysy jetkizilgen. Olardyń ekeýi – eresek jolbarys, ekeýi – kúshik. Kúshikter ázirge mamandardyń baqylaýynda ósip jatyr. Qajetti jasqa jetip, veterinariialyq tekserýler men minez-qulyq synaqtarynan ótken soń, olardy da tabiǵatqa jiberý máselesi qaralady.
Jolbarystardy Qazaqstanǵa qaitarý jumysy 2018 jyly «Ile-Balqash» memlekettik tabiǵi rezervaty qurylǵannan keiin júieli túrde qolǵa alynǵan. Osy ýaqyt ishinde toǵaily ormandardy qalpyna keltirý, jabaiy janýarlardyń sanyn kóbeitý jáne jyrtqyshtardyń qorektik bazasyn qalyptastyrý jumystary júrgizildi. Atap aitqanda, 2026 jylǵy qyrkúiekte «Altyn-Emel» ulttyq parkinen rezervatqa 30 qulan kóshirilgen.
Mamandar jolbarystardyń qozǵalysyn baqylap qana qoimai, jergilikti turǵyndardyń qaýipsizdigin qamtamasyz etýge de basymdyq berip otyr. Ol úshin adam men jyrtqysh arasyndaǵy yqtimal qaqtyǵystardyń aldyn alý toby qurylǵan.
Joba Qazaqstan men Reseidiń, sondai-aq halyqaralyq tabiǵat qorǵaý uiymdarynyń qoldaýymen júzege asyrylyp jatyr. Baǵdarlamanyń túpki maqsaty – Ile ózeniniń atyraýy men Ońtústik Balqash óńirinde tabiǵi jaǵdaida tirshilik etip, kóbeietin jolbarystar popýliatsiiasyn qalyptastyrý.
