Ystanbulda ótken óńiraralyq konferentsiiada 60-tan astam memlekettik qyzmetshi men sarapshy jasandy intellektini tiimdi basqarý, tsifrlyq qaýipsizdik jáne memlekettik qyzmetterge jańa tehnologiialardy engizý máselelerin talqylady, dep habarlaidy ult.kz.
2026 jylǵy 9 qazanda Ystanbul qalasynda «Jasandy intellektini basqarý tájiribesi» atty óńiraralyq konferentsiia ótti. Is-sharaǵa 14 elden 60-tan astam memlekettik qyzmetshi, praktik maman jáne BUU Damý baǵdarlamasynyń ókilderi qatysty.
Konferentsiiany Astana memlekettik qyzmet haby, Qazaqstandaǵy BUU Damý baǵdarlamasy, Koreia Respýblikasynyń Ishki ister jáne qaýipsizdik ministrligi men Ulttyq aqparattyq qoǵam agenttigi BUUDB-nyń Ystanbul óńirlik habynyń qoldaýymen uiymdastyrdy.
Jasandy intellektini damytýda adam múddesi basty orynda
BUUDB Ystanbul óńirlik habynyń basshysy Steliana Neder tehnologiialardy engizý qarqynynyń elder arasynda árkelki ekenin atap ótti. Onyń aitýynsha, tsifrlyq alshaqtyqtyń ulǵaiýyna jol bermeý úshin innovatsiialardy qoldaý men jasandy intellektini tiisti deńgeide retteý arasynda tepe-teńdik qajet.
Túrkiia Respýblikasy Prezidenti janyndaǵy Kiberqaýipsizdik basqarmasynyń jasandy intellekt jónindegi bas direktory Osman Gazi Giýchliýtúrk qaýipsizdikti qamtamasyz etetin, ekonomikalyq turǵydan tiimdi ári adamnyń sheshim qabyldaý quqyǵyn saqtaityn basqarý tásilderin damytý mańyzdy ekenin jetkizdi.
Astana memlekettik qyzmet haby basqarýshy komitetiniń tóraǵasy Alihan Baimenov adam men jasandy intellekt qatar áreket etetin jańa dáýirde jaýapkershilik pen adami baqylaýdyń mańyzy arta túsetinin aitty. Ol jasandy intellekt qoǵam igiligine qyzmet etip, adam quqyqtaryn qorǵaýy úshin memlekettik institýttardy nyǵaitý, mamandardyń quzyretterin damytý jáne tiisti qorǵanys tetikterin qalyptastyrý qajettigine toqtaldy.
Koreia tájiribesi: memlekettik qyzmetshilerdiń tsifrlyq quzyretterin damytý
Koreia Respýblikasy Ishki ister jáne qaýipsizdik ministrliginiń Memlekettik basqarýdaǵy jasandy intellekt biýrosynyń bas direktory Dong Sý Chang «Úkimettiń jasandy intellekt zerthanasy» bastamasyn tanystyrdy. Bul alańda memlekettik qyzmetshiler jumys barysynda kezdesetin máselelerdi ózderi anyqtap, jasandy intellekt kómegimen sheshimderdi synaqtan ótkizip, bastapqy úlgilerin ázirleidi.
Koreia tájiribesi tehnologiialyq infraqurylymdy damytýmen qatar, memlekettik qyzmetshilerdiń jańa quraldardy tiimdi paidalaný daǵdylaryn jetildirýdiń mańyzyn kórsetedi.
Konferentsiia qatysýshylary Koreianyń jasandy intellektini memlekettik basqarýǵa engizý tájiribesimen, ony qoldanýdyń quqyqtyq negizderimen, tsifrlyq sáikestendirý jáne kiberqaýipsizdikti nyǵaitý tetikterimen tanysty. Ortalyq Aziia, Kavkaz jáne Aziia-Tynyq muhity óńirlerinen kelgen ókilder óz elderindegi jetistikteri men jańa tehnologiialardy engizý kezinde kezdesetin qiyndyqtardy ortaǵa saldy.
Qazaqstan memlekettik qyzmetterdi tsifrlandyrý tájiribesin usyndy
Qazaqstannyń Jasandy intellekt jáne tsifrlyq damý ministrliginiń ókili Arýjan Saryeva memlekettik qyzmetterdi tsifrlandyrýdan jasandy intellektini damytýǵa kóshý baǵytyndaǵy jumystardy tanystyrdy.
Onyń málimetinshe, Qazaqstanda memlekettik qyzmetterdiń 92 paiyzy tolyq tsifrlandyrylǵan. Aldaǵy bes jyldaǵy basym mindetterdiń biri – bir million azamatqa jasandy intellektini qoldaný daǵdylaryn úiretý.
Sondai-aq baiandamada Tsifrlyq kodekstiń jáne jasandy intellekt týraly jeke zańnyń qabyldanýy, ulttyq sýperkompiýterlerdiń iske qosylýy men Astanada bilim berý, ǵylymi zertteýler jáne startaptardy qoldaýdy biriktiretin alem.ai halyqaralyq ortalyǵynyń ashylýy atap ótildi.
Halyqaralyq yntymaqtastyq – ortaq mindetterdi sheshý joly
Alihan Baimenov jańa tehnologiialarǵa teń qoljetimdilikti qamtamasyz etý jáne tsifrlyq teńsizdiktiń ulǵaiýyna jol bermeý úshin halyqaralyq yntymaqtastyqty nyǵaitý qajettigin atap ótti. Osy rette ol Koreia Respýblikasy qarjylandyratyn óńiraralyq bastamanyń nátijelerine toqtaldy.
2021 jyly iske qosylǵan bastamaǵa qatysýshy elderdiń sany jetiden on ekige deiin ósken. Osy ýaqyt aralyǵynda uiymdastyrylǵan oqytý is-sharalary 500-den astam memlekettik qyzmetshi men praktik mamandy qamtyǵan.
Konferentsiia aiasynda qatysýshylar jasandy intellekt agentterin memlekettik basqarýda qoldaný múmkindikterin de talqylady. Interaktivti sessiia barysynda olar mundai sheshimderdi óz elderinde qandai baǵyttardan bastap engizýge bolatynyn qarastyrdy.
Is-shara halyqaralyq tájiribe almasýǵa, praktikalyq quraldardy talqylaýǵa jáne memlekettik basqarýda jasandy intellektini qoǵam qajettilikterine sai, qaýipsiz ári jaýapty qoldaný tásilderin damytýǵa múmkindik berdi.
