Prezident Qasym-Jomart Toqaev usynǵan jańa Azamattyq kodeksti ázirleý bastamasy Qazaqstannyń quqyqtyq júiesin jańǵyrtýdaǵy mańyzdy kezeń bolýy múmkin. Mundai pikirdi zańger Marjangúl Ákimjanova Memleket basshysynyń 2026 jylǵy 28 qazandaǵy Qazaqstan halqyna Joldaýynda belgilengen mindetterge qatysty bildirdi dep habarlaidy ult.kz.
Mamannyń aitýynsha, azamattyq zańnamany jańartý qajettiligi eń aldymen ekonomikadaǵy ózgeristerge, tsifrlyq tehnologiialardyń damýyna jáne múliktik qatynastardyń jańa nysandarynyń paida bolýyna bailanysty.
«Kún saiyn derlik ózgerip jatqan álemde azamattyq quqyq ózgerissiz qala almaidy. Sonymen qatar kez kelgen jańǵyrtý jumysy qandai normalardyń shynymen jańartýdy qajet etetinin, al qaisysy óziniń tiimdiligin áldeqashan dáleldegenin túsinýden bastalýy tiis», – delingen sarapshynyń pikirinde.
Marjangúl Ákimjanova Qazaqstannyń qoldanystaǵy Azamattyq kodeksiniń Jalpy bólimi 1994 jyly qabyldanǵanyn eske saldy. Qujat naryqtyq ekonomikanyń qalyptasý kezeńinde ázirlenip, menshik quqyǵyn qorǵaý, shart erkindigi jáne azamattyq-quqyqtyq qatynastarǵa qatysýshylardyń derbestigi siiaqty negizgi qaǵidattardyń quqyqtyq negizin qalady.
Alaida búgingi tańda zańnama aldynda jańa mindetter tur. Olardyń qatarynda jasandy intellektini paidalaný, tsifrlyq aktivterdiń ainalymy, elektrondyq platformalardyń damýy jáne kelisimsharttyq qatynastardy avtomattandyrý máseleleri bar. Bul ózgerister azamattyq-quqyqtyq retteýdiń jańa tetikterin qalyptastyrýdy talap etedi.
Aldaǵy reforma kásipkerlik orta úshin de erekshe mańyzǵa ie. Sarapshynyń pikirinshe, júieli ári túsinikti azamattyq zańnama kelisimsharttyq qatynastardyń boljamdylyǵyn arttyryp, múliktik quqyqtardy qorǵaýǵa jáne quqyqtyq belgisizdikti azaitýǵa múmkindik beredi.
Zańger reformanyń tabystylyǵyn baǵalaýda úsh negizgi ólshemge nazar aýdarý qajettigin atap ótti. Olar – zańnamanyń azamattarǵa túsinikti bolýy, biznes úshin quqyqtyq ortanyń boljamdylyǵy jáne quqyqtyq tetikterdiń tiimdiligi.
Eske salaiyq, Qasym-Jomart Toqaev 2026 jylǵy 28 qazandaǵy Qazaqstan halqyna Joldaýynda jańa Azamattyq kodeksti ázirlep, 2027 jyldyń sońyna deiin qabyldaý mindetin qoiǵan bolatyn.
