Sotta «QazTransGaz Ónimderi» AQ-nyń burynǵy bas direktory Álik Ashirov jaýap berdi. Ol qorǵaý tarapynyń ótinishimen kýáger retinde shaqyrylǵanymen, onyń jaýaptary memlekettik aiyptaý tarapynyń nusqasyn rastap otyr.
Ashirov sottalýshynyń jieni Madiiar Qalmenovti tanymaitynyn aitty. Al avtosherý uiymdastyrýǵa bólingen ondaǵan million teńge Qalmenovke tiesili «BM Trust» kompaniiasy arqyly shyǵarylǵany aitylyp otyr. Kýáger kerisinshe Juldyz Artyqbaevany tanitynyn jetkizdi. Jobaǵa qatysty jumys keńesterine qandai merdiger kompaniialar qatysqany jónindegi advokattyń tikelei suraǵyna Ashirov tek Artyqbaevanyń kompaniiasy ǵana qatysqanyn aitty. Onyń ústine, atalǵan kompaniia jinalǵandarǵa bas uiymdastyrýshy retinde tanystyrylǵan eken.
Merdigerlerdiń qyzmetin tikelei Boqaevtyń baqylaǵanyn áýe biletter men qonaqúi qyzmetterin usynǵan «Business Travel Management» JShS-nyń burynǵy direktory Áziz Ǵaziev te kýáger retinde rastady. Ol sotta korporativtik áýe saparlaryna arnalǵan kompaniianyń baǵdarlamalyq qamtamasyz etýdi usynǵan tanystyrylymnyń Boqaevtyń jeke ózine uiymdastyrylǵanyn aitty. Sebebi Ǵazievke «QazTransGazda» mundai máselelerdiń barlyǵy boiynsha sheshimdi dál osy burynǵy keńesshi qabyldaityny naqty túsindirilgen.
Boqaevtyń burynǵy áriptesteriniń jaýaptary onyń týystaryna tiesili kompaniianyń «formaldy» ról atqarǵanyn jáne biýdjet qarajatynyń jumsalýyn Boqaevtyń ózi baqylaǵanyn aiqyndai bastaǵanda qorǵaýshylar ózderine úirenshikti sarynǵa basyp, protsesti sozyp, istiń mán-jaiyn basqa arnaǵa burý taktikasyn qoldandy.
Memlekettik aiyptaý tarapy Almatydaǵy «Ramada» qonaqúiin basqaratyn «Salem hotel management» JShS basshysy S. Babeldi sotqa shaqyrdy. Kýáger 2018 jyly konferentsiia qatysýshylaryn tamaqtandyrý men ornalastyrý shyǵyndaryn tolyǵymen «We Can» JShS tólegenin rastady. Bul túbirtekter Boqaevtyń barlyq shyǵyndy jieni tólegen degen nusqasyna taǵy da qaishy keletinin túsingen qorǵaýshylar sot talqylaýynyń negizgi taqyrybynan aýytqityn suraqtar qoia bastady.
Tólem somalary men qarjylyq operatsiialardy talqylaýdyń ornyna, advokattardy qonaqúidiń neshe juldyzdy jáne ǵimarattyń qansha qabatty ekeni, sondai-aq ashana zalyna qansha adam syiatyny, tańǵy astyń turý aqysyna kiretini-kirmeitini jáne nómir sanattarynyń qandai áriptik belgilermen kórsetiletini kóbirek qyzyqtyrdy.
