قىزىلوردا وبلىسىندا كريپتوۆاليۋتانى زاڭسىز ايىرباستاپ, ەسٸرتكٸ ساۋداسىنان تٷسكەن اقشانى زاڭداستىرعان ەكٸ ادام سوتتالدى. ولار تسيفرلىق اكتيۆتەر ارقىلى 1 ملرد تەڭگەدەن استام قارجى اينالىمىن جٷرگٸزگەن, دەپ حابارلايدى ult.kz.
قارجىلىق مونيتورينگ اگەنتتٸگٸنٸڭ مەلٸمەتٸنشە, كٷدٸكتٸلەر تيٸستٸ رۇقساتسىز, «استانا» حالىقارالىق قارجى ورتالىعىنىڭ ساۋدا الاڭدارىنان تىس جەردە Binance پلاتفورماسىنىڭ P2P قىزمەتٸ ارقىلى كريپتوۆاليۋتا ساۋداسىمەن اينالىسقان.
نەتيجەسٸندە ولار 1 ملرد تەڭگەدەن استام سوماعا تسيفرلىق اكتيۆتەر ساتىپ, زاڭسىز ايىرباستان 178 ملن تەڭگە تابىس تاپقان.
سونىمەن قاتار سوتتالعانداردىڭ بٸرٸ ەسٸرتكٸ ساۋداسىنان تٷسكەن اقشانى زاڭداستىرۋ سحەماسىن ۇيىمداستىرعان. ول قارجىنى قابىلداپ, ٶزگە شوتتارعا اۋدارۋ ٷشٸن بانك شوتتارىن پايدالانۋعا بەرگەن ادامداردى, ياعني دروپپەرلەردٸ تارتقان. وسى شوتتار ارقىلى 600 ملن تەڭگەدەن استام قاراجات ٶتكٸزٸلگەن.
ۆەدومستۆونىڭ حابارلاۋىنشا, تٷسكەن اقشا كريپتوۆاليۋتاعا ايىرباستالىپ, ەسٸرتكٸ ساۋداگەرلەرٸنٸڭ كريپتوەميياندارىنا جٸبەرٸلگەن. مۇنداي اۋدارىمداردىڭ جالپى كٶلەمٸ 277 مىڭ USDT-گە جەتكەن.
قىلمىستىق جولمەن تاپقان قاراجاتىنا سوتتالعاندار جٷك كٶلٸكتەرٸ مەن تٸركەمەلەر ساتىپ الىپ, ولاردى جاقىن تۋىستارىنىڭ اتىنا رەسٸمدەگەن. كەيٸن تەحنيكانى كەسٸپكەرلٸك ماقساتتا پايدالانىپ, زاڭدى تۇلعالارعا جالعا بەرگەن.
سوت ٷكٸمٸمەن ولاردىڭ بٸرٸنە ٷش جىل, ەكٸنشٸسٸنە ەكٸ جىل مەرزٸمگە باس بوستاندىعىن شەكتەۋ جازاسى تاعايىندالدى. سونىمەن قاتار تٶرت ارنايى تەحنيكا مەن قىلمىستىق جولمەن الىنعان 1 ملرد تەڭگەدەن استام تابىس مەملەكەت پايداسىنا تەركٸلەندٸ.
ٷكٸم زاڭدى كٷشٸنە ەندٸ.
