Алматыдағы Баума тоғайында үстіне ағаш құлаған 19 жастағы Селина Әбитованың жағдайы әлі де ауыр. Ол бір аптадан бері №4 қалалық клиникалық аурухананың жансақтау бөлімінде комада жатыр, деп хабарлайды ult.kz.
NewTimes.kz мәліметінше, қыз ауыр бас-ми жарақатын алып, аяқ және жамбас сүйектері сынған, сондай-ақ бауыры зақымданған. Дәрігерлер миға түсетін қысымды азайтып, өміріне төнген қауіпті төмендету үшін бас сүйегінің бір бөлігін алып тастауға мәжбүр болған.
Марқұмның әпкесі Ясминаның айтуынша, қайғылы оқиға сенбі күні болған. Селина анасы мен үш кіші сіңлісімен бірге Баума тоғайында серуендеп жүрген кезде отбасынан аз уақытқа алыстап кеткен. Қайтып келе жатқан сәтінде оның үстіне кенеттен үлкен ағаш құлаған.
Әпкесінің сөзінше, оқиға бірнеше секунд ішінде болған. Жедел жәрдем шамамен 10 минутта жеткенімен, Селина сол сәттен бері есін жимай жатыр.
Дәрігерлер алғашқы алты күн бойы ешқандай болжам жасамаған. Кейін қан қысымы мен гемоглобин деңгейін тұрақтандыруға мүмкіндік туған. Қазір оған беріліп жатқан дәрі-дәрмектердің мөлшері біртіндеп азайтылып жатыр. Алайда мамандар ми ісінуі немесе жаңа гематомалардың пайда болу қаупі әлі де сақталып отырғанын айтады.
Отбасының айтуынша, оқиға қатты желдің немесе дауылдың салдарынан болмаған. Олардың мәліметінше, ағаш күн ашық әрі ауа райы тынық кезде құлаған, ал жаңбыр мен жел шамамен 10–15 минуттан кейін ғана басталған.
Қазір отбасы адвокат жалдап, мемлекеттік органдарға ресми сауал жолдаған. Құлаған ағаш сараптамаға жіберілген, оның қорытындысы 7–10 күн ішінде дайын болады. Заңгердің алдын ала бағалауынша, оқиғаға жауапкершілік тоғайға күтім жасайтын мекемеге немесе жергілікті атқарушы органдарға жүктелуі мүмкін.
Алматы әкімдігі оқиға бойынша сотқа дейінгі тергеу басталғанын мәлімдеді. Ведомствоның хабарлауынша, Баума тоғайында ағаштардың құлау қаупі туралы ескерту белгілері орнатылған. Сонымен қатар биыл санитарлық кесу аясында 2 мың қураған және апатты ағашты кесуге рұқсат берілген. Қазіргі уақытқа дейін олардың мыңға жуығы жойылған, қалған жұмыстар жыл соңына дейін аяқталады.
Әкімдік мәліметінше, 1877 жылы негізі қаланған Баума тоғайындағы ағаштардың 70 пайыздан астамы табиғи қартаю кезеңіне жеткендіктен, сырт көзге сау көрінетін ағаштардың өзі құлау қаупін тудыруы мүмкін.
