Almatydaǵy Baýma toǵaiynda ústine aǵash qulaǵan 19 jastaǵy Selina Ábitovanyń jaǵdaiy áli de aýyr. Ol bir aptadan beri №4 qalalyq klinikalyq aýrýhananyń jansaqtaý bóliminde komada jatyr, dep habarlaidy ult.kz.
NewTimes.kz málimetinshe, qyz aýyr bas-mi jaraqatyn alyp, aiaq jáne jambas súiekteri synǵan, sondai-aq baýyry zaqymdanǵan. Dárigerler miǵa túsetin qysymdy azaityp, ómirine tóngen qaýipti tómendetý úshin bas súieginiń bir bóligin alyp tastaýǵa májbúr bolǵan.
Marqumnyń ápkesi Iasminanyń aitýynsha, qaiǵyly oqiǵa senbi kúni bolǵan. Selina anasy men úsh kishi sińlisimen birge Baýma toǵaiynda serýendep júrgen kezde otbasynan az ýaqytqa alystap ketken. Qaityp kele jatqan sátinde onyń ústine kenetten úlken aǵash qulaǵan.
Ápkesiniń sózinshe, oqiǵa birneshe sekýnd ishinde bolǵan. Jedel járdem shamamen 10 minýtta jetkenimen, Selina sol sátten beri esin jimai jatyr.
Dárigerler alǵashqy alty kún boiy eshqandai boljam jasamaǵan. Keiin qan qysymy men gemoglobin deńgeiin turaqtandyrýǵa múmkindik týǵan. Qazir oǵan berilip jatqan dári-dármekterdiń mólsheri birtindep azaitylyp jatyr. Alaida mamandar mi isinýi nemese jańa gematomalardyń paida bolý qaýpi áli de saqtalyp otyrǵanyn aitady.
Otbasynyń aitýynsha, oqiǵa qatty jeldiń nemese daýyldyń saldarynan bolmaǵan. Olardyń málimetinshe, aǵash kún ashyq ári aýa raiy tynyq kezde qulaǵan, al jańbyr men jel shamamen 10–15 minýttan keiin ǵana bastalǵan.
Qazir otbasy advokat jaldap, memlekettik organdarǵa resmi saýal joldaǵan. Qulaǵan aǵash saraptamaǵa jiberilgen, onyń qorytyndysy 7–10 kún ishinde daiyn bolady. Zańgerdiń aldyn ala baǵalaýynsha, oqiǵaǵa jaýapkershilik toǵaiǵa kútim jasaityn mekemege nemese jergilikti atqarýshy organdarǵa júktelýi múmkin.
Almaty ákimdigi oqiǵa boiynsha sotqa deiingi tergeý bastalǵanyn málimdedi. Vedomstvonyń habarlaýynsha, Baýma toǵaiynda aǵashtardyń qulaý qaýpi týraly eskertý belgileri ornatylǵan. Sonymen qatar biyl sanitarlyq kesý aiasynda 2 myń qýraǵan jáne apatty aǵashty kesýge ruqsat berilgen. Qazirgi ýaqytqa deiin olardyń myńǵa jýyǵy joiylǵan, qalǵan jumystar jyl sońyna deiin aiaqtalady.
Ákimdik málimetinshe, 1877 jyly negizi qalanǵan Baýma toǵaiyndaǵy aǵashtardyń 70 paiyzdan astamy tabiǵi qartaiý kezeńine jetkendikten, syrt kózge saý kórinetin aǵashtardyń ózi qulaý qaýpin týdyrýy múmkin.
