АҚШ, Канада және Мексикада өткен 2026 жылғы футболдан әлем чемпионаты тарихтағы ең қомақты жүлде қорымен ерекшеленді, деп хабарлайды ult.kz.
Турнирге қатысқан құрамалар арасында жалпы 871 миллион доллар көлемінде сыйақы бөлінді.
Биылғы әлем біріншілігі тарихта алғаш рет 48 ұлттық құраманың қатысуымен өтті. Турнирдің жеңімпазы атанған Испания құрамасы финалда Аргентинаны жеңіп, ең ірі қаржылай сыйақыға ие болды.
Испания 51 миллион доллар ұтып алды
2022 жылы Катарда өткен әлем чемпионатында жеңімпаз атанған Аргентина құрамасы 42 миллион доллар алған болса, 2026 жылғы чемпион Испанияның жүлдесі 51 миллион долларғадейін өсті.
Жүлде қоры төмендегідей бөлінді:
Әлем чемпионы Испания – 51 млн доллар;
Күміс жүлдегер Аргентина – 34 млн доллар;
Қола жүлдегер Англия – 30 млн доллар;
Төртінші орын алған Франция – 28 млн доллар;
Ширек финалға шыққан құрамалар – әрқайсысы 20 млн доллар;
1/8 финалға дейін жеткендер – 16 млн доллардан;
1/16 финалға шыққан командалар – 12 млн доллардан;
Топтық кезеңнен аса алмаған құрамалар – 10 млн доллардан алды.
FIFA командалардың барлық шығынын өтеді
Әлем чемпионаты бірден үш мемлекетте өткендіктен, ұлттық құрамалардың жол жүруі, қонақүйде тұруы және логистикалық шығындары айтарлықтай артқан. Осыған байланысты FIFA қосымша 100 миллион доллардан астам қаржы бөлді.
Ұйым әр ұлттық федерацияның 50 адамнан тұратын делегациясының екі бағыттағы әуе билеттерін, қонақүйдегі тұруын, тамақтануын, ішкі көлік шығындарын және қызметтік автокөліктерін толық қаржыландырды.
Әлем чемпиондары алғаш рет арнайы сақина алады
Ақшалай сыйақымен қатар Испания құрамасының футболшылары мен бапкерлер штабына алғаш рет арнайы чемпиондық сақиналар табысталады.
Мұндай марапат әлем чемпионаттарының тарихында алғаш рет енгізіліп отыр. Бұл бастама Солтүстік Американың NBA, NHL және NFL лигаларындағы дәстүрден алынған.
Сақиналар қолмен жасалады. Оның бір бетінде Әлем кубогының бейнесі, ал екінші жағында Испания құрамасының рәмізі мен әр футболшының жеке нөмірі бейнеленеді.
Финалдық матч аяқталғаннан кейін чемпиондық сақиналар алдымен Испания құрамасының капитаны мен бас бапкеріне табысталды. Қалған ойыншылар марапаттарын олардың саусақ өлшеміне сәйкес дайындалғаннан кейін алады.
