AQSh, Kanada jáne Meksikada ótken 2026 jylǵy fýtboldan álem chempionaty tarihtaǵy eń qomaqty júlde qorymen erekshelendi, dep habarlaidy ult.kz.
Týrnirge qatysqan quramalar arasynda jalpy 871 million dollar kóleminde syiaqy bólindi.
Biylǵy álem birinshiligi tarihta alǵash ret 48 ulttyq quramanyń qatysýymen ótti. Týrnirdiń jeńimpazy atanǵan Ispaniia quramasy finalda Argentinany jeńip, eń iri qarjylai syiaqyǵa ie boldy.
Ispaniia 51 million dollar utyp aldy
2022 jyly Katarda ótken álem chempionatynda jeńimpaz atanǵan Argentina quramasy 42 million dollar alǵan bolsa, 2026 jylǵy chempion Ispaniianyń júldesi 51 million dollarǵadeiin ósti.
Júlde qory tómendegidei bólindi:
Álem chempiony Ispaniia – 51 mln dollar;
Kúmis júldeger Argentina – 34 mln dollar;
Qola júldeger Angliia – 30 mln dollar;
Tórtinshi oryn alǵan Frantsiia – 28 mln dollar;
Shirek finalǵa shyqqan quramalar – árqaisysy 20 mln dollar;
1/8 finalǵa deiin jetkender – 16 mln dollardan;
1/16 finalǵa shyqqan komandalar – 12 mln dollardan;
Toptyq kezeńnen asa almaǵan quramalar – 10 mln dollardan aldy.
FIFA komandalardyń barlyq shyǵynyn ótedi
Álem chempionaty birden úsh memlekette ótkendikten, ulttyq quramalardyń jol júrýi, qonaqúide turýy jáne logistikalyq shyǵyndary aitarlyqtai artqan. Osyǵan bailanysty FIFA qosymsha 100 million dollardan astam qarjy bóldi.
Uiym ár ulttyq federatsiianyń 50 adamnan turatyn delegatsiiasynyń eki baǵyttaǵy áýe biletterin, qonaqúidegi turýyn, tamaqtanýyn, ishki kólik shyǵyndaryn jáne qyzmettik avtokólikterin tolyq qarjylandyrdy.
Álem chempiondary alǵash ret arnaiy saqina alady
Aqshalai syiaqymen qatar Ispaniia quramasynyń fýtbolshylary men bapkerler shtabyna alǵash ret arnaiy chempiondyq saqinalar tabystalady.
Mundai marapat álem chempionattarynyń tarihynda alǵash ret engizilip otyr. Bul bastama Soltústik Amerikanyń NBA, NHL jáne NFL ligalaryndaǵy dástúrden alynǵan.
Saqinalar qolmen jasalady. Onyń bir betinde Álem kýbogynyń beinesi, al ekinshi jaǵynda Ispaniia quramasynyń rámizi men ár fýtbolshynyń jeke nómiri beinelenedi.
Finaldyq match aiaqtalǵannan keiin chempiondyq saqinalar aldymen Ispaniia quramasynyń kapitany men bas bapkerine tabystaldy. Qalǵan oiynshylar marapattaryn olardyń saýsaq ólshemine sáikes daiyndalǵannan keiin alady.
