Bir kúndik saýda barysynda myń tonnadan astam azyq-túlik satylyp, 140 saýda orny uiymdastyryldy. Óńirdiń túkpir-túkpirinen kelgen ondaǵan aýyl sharýashylyǵy taýaryn óndirýshi óz ónimderin elorda turǵyndaryna usyndy. Osylaisha, Aqmola oblysy Astanadaǵy aýyl sharýashylyǵy jármeńkeleriniń maýsymyn qorytyndylady.
Saýda sórelerinen kúndelikti tutynatyn azyq-túliktiń barlyq túrin derlik tabýǵa bolady. Atap aitqanda, et, balyq, sút ónimderi, un, jarma, ósimdik maiy, kartop, kókónister men jumyrtqa satyldy. Sonymen qatar elordaǵa 350 myń dana jumyrtqa jetkizildi. Jalpy, satyp alýshylarǵa 50-den astam túrli ónim usynyldy. Baǵalar naryqtaǵy ortasha qunnan 10-15 paiyzǵa tómen boldy.
Jármeńkege óńirge jaqsy tanys «Rodina», «Burabay Milk», «Bijan», «Makinsk qus fabrikasy», «Aqkól Qus», «Ijevskii» jáne basqa da kásiporyndardyń ónimderi qoiyldy. Saýdaǵa oblystyń 17 aýdanynan, sondai-aq Kókshetaý, Qosshy jáne Stepnogor qalalarynan kelgen sharýashylyqtar qatysty.
Saýda-sattyq kontserttik baǵdarlamamen jáne óńirdiń salt-dástúrimen tanystyrý sharalarymen qatar ótti. Kelýshiler qazaq batyrynyń beinesinde sýretke túsip, ulttyq oiyndarǵa qatysyp, ECO Birlik ekologiialyq aktsiiasyna qosyla aldy. «Taza Qazaqstan» bastamasy aiasynda qonaqtar plastik qaldyqtaryn tapsyryp, estelik syilyqtarǵa ie boldy. Al aqmolalyq volonterler satyp alýshylarǵa aýyr sómkelerin kóterisip, alǵan zattaryn kólikke deiin jetkizýge kómektesti.
Degenmen óńirdiń elordanyń azyq-túlik naryǵyndaǵy mańyzy jármeńke aiasyndaǵy jetkizilimdermen ǵana shektelmeidi. Búginde Aqmola oblysy Astananyń sút ónimderine degen qajettiliginiń shamamen 40 paiyzyn, etke degen suranysynyń 30 paiyzǵa jýyǵyn jáne taǵamdyq jumyrtqaǵa qajettiliginiń 80 paiyzyn qamtamasyz etedi. Bul kórsetkishter óńirdegi aýyl sharýashylyǵy áleýetiniń joǵary ekenin jáne qaita óńdeý kásiporyndarynyń turaqty jumys istep jatqanyn kórsetedi.
Óńir biligi bul áleýetti odan ári arttyrýdy kózdep otyr. Perspektivaly baǵyttardyń biri – etti mal sharýashylyǵyn damytý. Prezident Qasym-Jomart Toqaev óziniń Joldaýynda Ereimentaý aýdanynda et klasterin qurýǵa nazar aýdarǵan bolatyn. Joba aiasynda árqaisysy 20 myń bas iri qara malǵa arnalǵan úsh asyl tuqymdy mal ósirý reprodýktory, 30 myń basqa arnalǵan bordaqylaý alańy jáne 300-ge jýyq fermerlik sharýashylyq biriktiriledi.
«Búginde aldymyzǵa elordany azyq-túlikpen qamtamasyz etý sheńberinen shyǵý mindetin qoiyp otyrmyz. Aqmola oblysy óndiris kólemin ulǵaityp, Qazaqstannyń ózge óńirlerine jetkizilimderdi keńeitýi kerek. Osy maqsatta mal sharýashylyǵyn damytyp, asyl tuqymdy mal ákelip, fermerlik sharýashylyqtardy qoldap kelemiz. «Bereke» baǵdarlamasy aiasynda oblysymyz alǵashqylardyń biri bolyp qarjylandyrýǵa ie bolyp, bólingen qarajat kólemi boiynsha kósh bastady. Mundai jobalardy qoldaý otandyq et óndirisin arttyryp, elimizdiń azyq-túlik qaýipsizdigin nyǵaitýǵa múmkindik beredi», – dedi Aqmola oblysynyń ákimi Marat Ahmetjanov.
Sonymen qatar óńirde sút óndirisin ulǵaitý jumystary júrgizilip jatyr. Sońǵy úsh jylda jalpy qýattylyǵy 5,8 myń basqa arnalǵan alty sút-taýar fermasy ashyldy. 2026-2028 jyldary taǵy alty fermany salý josparlanǵan. Boljam boiynsha, 2030 jylǵa qarai aýyl sharýashylyǵy kásiporyndarynda óndiriletin taýarlyq sút kólemi eki esege jýyq artady.
Qazirdiń ózinde elordany azyq-túlikpen qamtamasyz etýde mańyzdy oryn alatyn Aqmola oblysy mal sharýashylyǵy men qaita óńdeý salalaryn damytý arqyly qazaqstandyq naryqtaǵy úlesin odan ári arttyrýdy kózdep otyr.
