Qyzylorda oblysynda 16 jyl boiy bir kásiporynda baqylaýshy-mehanik bolyp eńbek etken azamat jumys berýshiniń zańsyz tártiptik jazasyna qatysty sotta jeńiske jetti, dep habarlaidy ult.kz.
Oblystyq sottyń baspasóz qyzmetiniń málimetinshe, azamat kásiporynnyń áleýmettik máseleler jónindegi keńesinde sol kezdegi kásipodaq komitetiniń tóraǵasy retinde jumysshylardyń eńbek jáne áleýmettik máselelerine qatysty pikir bildirgen.
Alaida osy jiynnan keiin jumys berýshi ony kásiporynnyń qupiia aqparatyn jariialady dep aiyptap, qatań sógis jariialaǵan.
Buiryqpen kelispegen azamat kelisý komissiiasyna júgingen. Biraq komissiia músheleriniń daýysy teń túskendikten, oǵan daýdy sot arqyly sheshý quqyǵy túsindirilgen.
Memlekettik eńbek inspektsiiasy da jumys berýshiniń eńbek zańnamasyn buzǵanyn anyqtap, zańbuzýshylyqtardy joiý týraly uiǵarym shyǵarǵan.
Sotta azamattyń qupiia aqparatpen jumys isteýge ruqsaty bolmaǵany, al jariialandy delingen málimetterdiń zańmen qorǵalatyn qupiia aqparat ekeni dáleldenbegeni anyqtaldy. Sonymen qatar qyzmettik tekserý qorytyndysynda naqty qandai aqparattyń kimge jáne qandai jaǵdaida jariialanǵany kórsetilmegen.
Buǵan qosa, qyzmetkerdiń áreketinen kásiporynǵa eshqandai zalal kelmegeni belgili boldy.
Osy mán-jailardy eskergen sot tártiptik teris qylyqtyń dáleldenbegeni týraly qorytyndyǵa kelip, qatań sógis jariialaý týraly buiryqty zańsyz dep tanyp, kúshin joidy.
Qyzylorda oblystyq sotynyń azamattyq ister jónindegi sot alqasy birinshi satydaǵy sot sheshimin ózgerissiz qaldyrdy.
