Фото: Halyq Uni
Қазақстан Үкіметі «Қайтарылған активтерді басқару компаниясы» ЖШС-ын құрды. Тиісті құжат ҚР нормативтік құқықтық актілерінің электронды түрдегі эталондық бақылау банкі сайтында жарияланды.
«Жарғылық капиталына мемлекет жүз пайыз қатысатын «Қайтарылған активтерді басқару компаниясы» жауапкершілігі шектеулі серіктестігі құрылсын.
«Заңсыз иемденілген активтерді мемлекетке қайтару туралы» ҚР Заңында және басқа да заңдарда белгіленген тәртіппен қайтарылған активтерді басқару, сақталуын қамтамасыз ету, өткізу серіктестік қызметінің негізгі нысаналары болып айқындалсын.
Серіктестіктің жарғылық капиталына қатысудың мемлекеттік үлесіне иелік ету және оны пайдалану құқықтары Қаржы министрлігінің Мемлекеттік мүлік және жекешелендіру комитетіне берілсін», - делінген Премьер-Министр қол қойған қаулыда.
Басқарушы компанияның міндеттері – мемлекетке қайтарылған активтерді оның атынан меншігіне қабылдау, мемлекет кірісіне айналдырылған активтердің сақталуын және ұсталуын қамтамасыз ету, активтерге билік ету, активтерді өткізуден түскен қаражатты арнаулы мемлекеттік қорға аудару.
Қаулы қол қойған күннен бастап күшіне енді.
Айта кетейік, биыл Қазақстанда "Заңсыз иемденген активтерді мемлекетке қайтару туралы" заң қабылданды. Оған сәйкес, заңсыз байыды деген күдікке ілінген жеке және заңды тұлғалардың реестрі жасалады. Тізім жабық болады. Заң аясында активтерді басқару компаниясы құрылады. Ол қайтарылған активтерді сатудан түскен қаражатты арнайы мемлекеттік қорға аударады.
413 рет оқылды
