Қазақстанда бірқатар мұсылмандық діни рәсім өткізуге қатысты өзгерістер енгізілді. Ол туралы Қазақстан Мұсылмандары діни басқармасының төрағасы Наурызбай қажы Тағанұлы мәлім етті, деп хабарлайды ҚазАқпарат.
«Биыл Қазақстан Мұсылмандары діни басқармасының 30 жылдық мерейтойы. Осы уақыттың ішінде діни басқарма ел алдында абыройға жетті. Бүгін осы мерейтой аясында IV республикалық имамдардың онлайн форумы өтіп жатыр. Форумда бірқатар діни құжат қайта қаралып, қабылданды. Атап айтар болсақ, «Ас беру мәдениеті», «Зират және зиярат мәдениеті», «Зияткер имам» құжаттары қабылданып отыр. Бұл құжаттар адамдардың діни мәдениетін сақтау мен дамытуға үлес қосады деген сенімдеміз», - деді Наурызбай қажы Тағанұлы.
Бас мүфтидің айтуынша, аталған құжаттардың заңдық күші жоқ, тек қана насихаттау мақсатын көздейді.
«Мысалы, ас бергенде адамдар ысырапқа бармауы тиіс. Біз құжатта ас берудің уақыты мен қандай тағамдар болуы тиіс екенін көрсететін боламыз. Сондай-ақ, зират пен зиярат мәдениетіне келсек, қазір өздеріңіз білесіздер қасиетті орындарға барушылардың саны көбейіп жатыр. Осы орайда шариғат шеңбері мен салт-дүстүрге сай зиярат жасауды үйрететін боламыз. Яғни асыра сілтеушілік болмауы қажет. Бұның барлығы адамдардың діни рәсім мен әдет-ғұрыпты ұстану мәдениетін қалыптастыру мақсатында жасалынып отыр», - деді ол.
Діни басқармасының басшысы мәлім еткендей, алдағы уақытта діни рәсімге қатысты жаңа құжаттардың маңызын имамдар ел арасында насихаттайтын болады.
830 рет оқылды
