قازاقستاندا بٸرقاتار مۇسىلماندىق دٸني رەسٸم ٶتكٸزۋگە قاتىستى ٶزگەرٸستەر ەنگٸزٸلدٸ. ول تۋرالى قازاقستان مۇسىلماندارى دٸني باسقارماسىنىڭ تٶراعاسى ناۋرىزباي قاجى تاعانۇلى مەلٸم ەتتٸ, دەپ حابارلايدى قازاقپارات.
«بيىل قازاقستان مۇسىلماندارى دٸني باسقارماسىنىڭ 30 جىلدىق مەرەيتويى. وسى ۋاقىتتىڭ ٸشٸندە دٸني باسقارما ەل الدىندا ابىرويعا جەتتٸ. بٷگٸن وسى مەرەيتوي اياسىندا IV رەسپۋبليكالىق يمامداردىڭ ونلاين فورۋمى ٶتٸپ جاتىر. فورۋمدا بٸرقاتار دٸني قۇجات قايتا قارالىپ, قابىلداندى. اتاپ ايتار بولساق, «اس بەرۋ مەدەنيەتٸ», «زيرات جەنە زييارات مەدەنيەتٸ», «زيياتكەر يمام» قۇجاتتارى قابىلدانىپ وتىر. بۇل قۇجاتتار ادامداردىڭ دٸني مەدەنيەتٸن ساقتاۋ مەن دامىتۋعا ٷلەس قوسادى دەگەن سەنٸمدەمٸز», - دەدٸ ناۋرىزباي قاجى تاعانۇلى.
باس مٷفتيدٸڭ ايتۋىنشا, اتالعان قۇجاتتاردىڭ زاڭدىق كٷشٸ جوق, تەك قانا ناسيحاتتاۋ ماقساتىن كٶزدەيدٸ.
«مىسالى, اس بەرگەندە ادامدار ىسىراپقا بارماۋى تيٸس. بٸز قۇجاتتا اس بەرۋدٸڭ ۋاقىتى مەن قانداي تاعامدار بولۋى تيٸس ەكەنٸن كٶرسەتەتٸن بولامىز. سونداي-اق, زيرات پەن زييارات مەدەنيەتٸنە كەلسەك, قازٸر ٶزدەرٸڭٸز بٸلەسٸزدەر قاسيەتتٸ ورىندارعا بارۋشىلاردىڭ سانى كٶبەيٸپ جاتىر. وسى ورايدا شاريعات شەڭبەرٸ مەن سالت-دٷستٷرگە ساي زييارات جاساۋدى ٷيرەتەتٸن بولامىز. ياعني اسىرا سٸلتەۋشٸلٸك بولماۋى قاجەت. بۇنىڭ بارلىعى ادامداردىڭ دٸني رەسٸم مەن ەدەت-عۇرىپتى ۇستانۋ مەدەنيەتٸن قالىپتاستىرۋ ماقساتىندا جاسالىنىپ وتىر», - دەدٸ ول.
دٸني باسقارماسىنىڭ باسشىسى مەلٸم ەتكەندەي, الداعى ۋاقىتتا دٸني رەسٸمگە قاتىستى جاڭا قۇجاتتاردىڭ ماڭىزىن يمامدار ەل اراسىندا ناسيحاتتايتىن بولادى.
