Elbasy Nursultan Ábishuly Nazarbaev «Bolashaqqa baǵdar: Rýhani jańǵyrý» maqalasynda «Týǵan jer» baǵdarlamasyn qolǵa alýdy usynǵan bolatyn. «Patriotizm kindik qanyń tamǵan jerińe, ósken aýylyńa, qalań men óńirińe, iaǵni týǵan jerińe degen súiispenshilikten bastalady. Týǵan jerge, onyń mádenieti men salt-dástúrlerine airyqsha ińkárlikpen atsalysý – shynaiy patriotizmniń mańyzdy kórinisteriniń biri. Bul shyn mánindegi ult etetin mádeni-genetikalyq kodynyń negizi» – dedi Elbasy óz maqalasynda. Tuńǵysh qazaq partiiasy – «Alash» partiiasyngyń qurylǵanyna 100 jyl tolýyna orai oblystyq máslihat depýtaty, óner men mádeniet janashyry Oral Sartaevtiń bastamasymen «Ulylarǵa taǵzym – urpaqqa amanat» salt atty ekspeditsiiasy bir apta boiy Baianaýyldy aralap, uly tulǵalarǵa taǵzym etti. Osy ýaqyt ishinde salt atty saiahatshylar 550 shaqyrymnan asa qashyqtyqty júrip ótti. Sapar Baianaýyl aýdanynyń ákimi Orazgeldi Qaiyrgnldinov pen «Nur Otan» partiiasynyń Baianaýyl aýdandyq filialy tóraǵasynyń birinshi orynbasary Raýan Jantelievtiń qoldaýymen júzege asty.
Baianaýyl jurty memleket basshysynyń ideiasyn qoldap, týǵan jerdiń qadir qasietin jastarǵa uǵyndyrý maqsatyn ustandy. Salt atty saiahatshylardy saltanatty túrde shyǵaryp salý rásiminde Baianaýyl aýdanynyń ákimi Orazgeldi Áliǵazyuly: «Biz Baianaýyl jurty talai danalarymyzdy dúniege ákelgen qasietti topyraqqa taǵzym etemiz. «Nur Otan» partiiasy – «Alash» partiiasynyń zańdy jalǵasy. Sondyqtan da babalarymyz armandaǵan táýelsizdikke biz, urpaqtary, jetip otyrmyz. Baianaýyldyń eljandy, asqaq rýhty azamattarynyń bastamasymenuiymdastyrylyp otyrǵan osynaý shara – týǵan jerdiń qasietin asqaqtata, aspandata túseri sózsiz» – dedi. Baianaýyl aýdanynyń qurmetti azamaty Murat Rahmetovtyń aq batasymen jolǵa shyqqan saiahatshylar Leker qajy Qurymbaiuly aýylyna jol tartty.
Sapardyń alǵashqy kúnindeǵumyrynda eki ret basty paryzyn ótegen, dúnie-múlik, bailyq jimai, aqyl-parasatymen, kóregendiligimen ortasyna syily bolǵan Leker qajy ata arýaǵyna quran baǵyshtady. Odan ári jazýshy, «Alash» partiiasynyń múshesi Júsipbek Aimaýytov atyndaǵy aýylda boldy. Saiahatshylar tobyn aýdan ákiminiń orynbasary Mádeniet Ahmetov, aýyl ákimi Rýslan Muqashev jáne aýyl aqsaqaldary qarsy aldy. Áýlieli Qyzyltaý baýyrynda oryn tepken qasietti mekende oblystyq kókpar týrniri uiymdastyryldy. Tartysty týrnirde Mai aýdany «Saty» aýylynyń komandasy top jardy. Jeńimpazdardy salt atty sherý músheleri marapattady. Kókpar básekesinde baq synaǵan eń jas komanda jergilikti jerdiń 10-11-shi synyp oqýshylarynan quralǵan komanda boldy. Oblys kóleminde olja salyp júrgen saiypqyran palýandarmen iyq tirestire óner kórsetken jastar kópshiliktiń yqylasyna bólendi.
Salt atty sherýde atqa qonǵan ólketanýshy, shejireshi Ramazan Nurǵaliev ólkeniń tarihymen tanystyrdy. Aldymen Iliias Jansúgirovtyń «Qulager» poemasynda ataqty Pań Nurmaǵambettiń ákesi Saǵynaiǵa úsh júzdiń basyn qosyp Ereimentaýda as bergen jiynda, myń úsh júz attyń ishinen shashasyna shań juqpaǵan júirik tulpardy jazbai tanyǵan Qozǵan Kúreńbai synshynyń máńgilik jai tapqan mekenin kórsetti.
Synshy beiitinen Haziret qystaǵyna jol tartqan sherýge alystan Mádidiń Úshqarasy menmundalap turdy. Qaraǵandy oblysynyń Egindibulaq aýdany men Júsipbek aýylyn Túndik ózeni bólip jatyr. Ramazan Dinisuly Haziret qystaǵyndaǵy eski jurttyń ornyn kórsetti. «Bul jer eski medireseniń orny. Buny Buharadaǵy Kókiltash medresesinde oqyǵan Ábilda haziret Isabekuly Kúlik rýynyń bai-qýatty azamattarynyń kómegimen saldyrǵan. Bul mediresede Júsipbek Aimaýytov pen Qadyr Taishyqov saýat ashqan» - dedi ólketanýshy. Bul medireseniń taǵy bir ereksheligi qyz balalardyń da bilim alǵandyǵy. Kúlik eliniń azamattary qyzdarynyń da kózi ashyq bolǵanyn basty nazarda ustaǵan. Saiahatshylar osy mańdaǵy Ákimbek beiitine de táý etti.
«Júsipbek Aimaýytov dúniege kelgen Dándebai aýyly qazirgi aýyl turǵan jerden on eki shaqyrymdai qashyqtyqtaǵy Qaranyń adyry degen jerde. Dándebai aýyly qolónershilikti asa joǵary deńgeide damytqan. Sol kezeńderde «Dándebai kórpeleri», «Dándebai syrmaǵy», «Dándebai tymaǵy» degen sózder kóp aitylǵan. Sol Dándebaidan Oimaýyt, Torǵaýyt, Ábdiraman, Isa, Ospan degen bes ul týady. Bes uldyń úlkeni Oimaýyt Júsipbektiń ákesi» – dedi Ramazan Nurǵaliev.
Qazaq teatrynyń atasy Jumat Shanin dúniege kelgen Kúrkeli aýylyna jol tartqan atty saiahatshylar jol boiynda ornalasqan Mailytondardyń eski qorymynda jatqan marqumdarǵa quran baǵyshtady. Salt atty seriler Ánet taýy eteginde ornalasqan Maqash qystaýyna túnedi. Erteńine qystaý iesi Sútjan Kárimovtyń jol bastaýymen eski meshit orynymen tanysty. «Bul jer Nurǵali molla meshitiniń orny. Nurǵali óz zamanynda Troitsk mediresesin bitirgen bes qazaqtyń biri. HÚIII-HIH ǵasyrlarda Qulboldy-Mailytonnan muǵalim men moldalardyń kóktep shyǵýynyń syry osynda» - dedi osynaý ólkeniń tarihyn jastaiynan tanyp ósken Sútjan Kárimov.
Qystaý mańynda qazaqtyń taǵy bir asyl perzentiniń beiiti ornalasqan. Ekibastuz ataýynyń paida bolýy men áiili kómir kenishiniń ashylýyna tikelei septigi tigen geolog, dala akademigi Qosym Pishenbaev osy qystaý mańynda jerlengen.
Maqash qystaýynan asa bere Áýliebulaqtan sýsynyn qandarǵan jolaýshylarǵa, atty sapar basshysy Oral Rahmashuly osy mańnyń syryn baian etti: «Bul jer bizdiń atalarymyz Aqbýra Qarqynbai myrzanyń qonysy bolǵan. Osy mańda «Qarqanbaidyń sabasyn» bilmeitin qazaq joq. Shoń bi Súiindiktiń atynan Qarakesek Qonysbaiǵa as beredi. Sol asta qonaqtardy qymyzben qamtýdy bizdiń atamyzǵa júkteidi. Tórt qula aiǵyrdyń terisinen jasalǵan sabanyń jan jaǵynan kerege tartylyp, kiiz úi qurylǵan eken. Sol sabany úsh atty jigit turyp pisetin kórinedi. As barysynda qymyz bir sát te úzilmei jetip turǵan. Meiramnyń bes balasyna túgeldei jetti deitin kórinedi el. Sabany toltyrý úshin 300 bie saýylǵan». Sonymen birge Áýliebulaq basynda Aqbýradan shyqqan áýlielerge eskertkish tas ornatylǵan.
Top múshesi, «Maqai seri» atanǵan qolóner sheberi Maqsutbek Kópjasarovtyń aitýynsha, ótken ǵasyrlarda Baianaýla dese osy óńirde ǵumyr keshken dáýleti men sáýleti qatar kelisken, mal men baq qatar bitken Aqtai bolys birden aýyzǵa ilinetin bolǵanyn aitty.
Sapardyń ekinshi kúni Kúrkeli aýylyna jetken sal-serilik dástúrdi jalǵaýshy topty aýyl ákimi Tańat Saǵyntaev pen aýyl aqsaqaldary qarsy aldy. Búgingi kúnniń serileri aýyl ónerpazdary uiymdastyrylǵan merekelik kontsertke qatysty.
Jumat Shanin dúniege kelgen Shana qazirgi ýaqytta Qaraǵandy oblysynyń aýmaǵyna ótip kese de, rejisser atyndaǵy aýyl dara darynnnyń esimin eleýsiz qaldyrmaǵan. Mektep ataýy da aqyn, «Alashtyń» arda azamaty Qoshke Kemeńgerovtyń esimin ielengen. Osynaý óńirde sýyryp salma aqyndar Qobylan Bóribaiuly, Tiyshtyǵul Manabaiuly, «ándi erttep, kúidi mingen» ánshiler Jarylǵapberdi Jumabaiuly, Qali Baijanov dúniege kelgen.
Kúrkeli aýylynyń balǵyndary asyq oinyn sheber meńgergenin kórsetti. Eptilik pen dáldikti, shapshańdyqty talap etetin oiyn jetkinshekterdiń durys jetilýine yqpal etedi.
Rýh joqshylary men ulttyq bolmysty izdegen seriler sapardyń úshinshi kúni tektilerdiń mekeni – Jaiaý Musa aýylyna – Jańatilek aýylyna kelip tústi. Olardy Jańatilek aýyldyq okrýginiń ákimi Jabai Musabaev pen aýyl aqsaqaldary kútip aldy.
«Aq sisa» poemasynda Ǵalym Jailybai:
...Kókiregi jyr-kórik,
Qushaq jaiǵan baýyr kóp.
Jaiaý Musa jyr bolyp,
Jaiaý Musa aýyl bop...
... Óter-ótpes beker kún,
Japyraǵymdy jaiam da.
Men kelermin, ketermin –
Baian izdep Baianǵa» - dep jyrlaǵandai, babalar dástúrin dáriptep, baiansyz tirshiliktegi baýyrlastyqty baqyt dep biletin búginginiń serilerin aqyn aýyly aqynnyń ózindei bolyp, sózindei bolyp qarsy aldy.
Meimandar aldynda sóz alǵan Jabai Janábiluly: «Jańatilek aýylynyń aýmaǵynda áigili ánshi, kompozitor, aqyn Jabai Toǵandyqov pen Jaiaý Musa Baijanuly, qusbegi, ańshylar Sholaq Omaruly, Ysqaq Úpánuly, Uly Otan soǵysynyń batyry Baqyt Haidarov, jazýshy Zeitin Aqyshev syndy qazaqtyń marqasqalary dúniege kelgen. Sol babalarymyzdyń atyna kir keltirmeýge tyrysyp, keiingi urpaq ósip-jetilip keledi» - dedi. Qonaqtar qurmetine qissashy, 80 jastan asqan aýyl aqsaqaly Imash Qojamberdin «Eńlik – Kebek» jyryn jatqa aitty. «Men esh qarip tanymai, muǵalim aldyn kórmei óstim. Tek úlkenderdiń basqosý, jiyndarynda estigen jyr, qissalardyń jattap alyp otyrdym. Qazaq bizdeilerdi «Quimaqulaq» dep ataǵan» - deidi Imash ata.
Merekelik án-jyr keshinen keiin, at sportyna degen alabóten yqylastaryn tanytqan aýyl azamattary arasynda aýdaryspaq týrniri ótti. At ústindegi beldesýde qarsylas shydatpaǵan ekspeditsiia múshesi oblysqa tanymal atbegi, palýan Baqytjan Júnisov birinshi oryndy jeńip aldy.
Erteńine osy aýylda tynyqqan saparshylarmen birge aýyl ákimi Jabai Janábiluly bastaǵan úsh salt atty Qaraǵandy oblysy, Buqar jyraý aýdanynda ornalasqan Buqar jyraý kesenesine bet aldy. Atty topqa Qaiyrbek Kákenov esimdi jelaiaq ta ere shyqty. Ol Muryntal bólimshesine deiin 40 shaqyrymǵa jýyq qashyqtyqty jaiaý júgirip ótti.
Ulylarǵa taǵzym etýshiler Oljabai batyr, áýlie Máshhúr Júsip dúniege kelgen Dalba taýynyń eteginen tebirenispen ótti. Jergilikti halyq bul taýdy Totiia taýy dep ataidy. Ekspeditsiia múshesi, Jańatilek aýylynyń turǵyny Aldamjar Altynbek aǵamyzdyń aitýynsha, taýdyń bulai atalý sebebi, Qarakesek rýynyń Totiia esimdi qyzy bul elge kelin bolyp túsken eken. Totiia – bizdiń Babyr atamyzdyń anasy. Aqyl-parasatymen eldiń anasyna ainalǵan aqylman áiel dúnieden óter shaǵynda urpaqtaryna: «Meni myna taýdyń basyna jerleńder, tórkinime qarap jataiyn», - dep ósiet etken eken. Sodan beri urpaqtary taýdy uly analarynyń esimimen atap ketken eken.
Atty saiahatshylar Musanyń shoqysynda bolyp «Kólinde Jasybaidyń sairan salyp, Baian ánin Aqbetten asqaqtatqan», «Attydan jaiaý júrip kegin alǵan» – Jaiaý Musa Baijanuylnyń ziratyna ziiarat etti. Budan ári salt attylar «Qazybek bi sóresi» atalyp ketken jerge at basyn burdy. Bul jerde 1764 jyly Qazaq handyǵynyń asa iri memleket qairatkeri Qaz daýysty Qazybek bi qaitys bolǵan. Múrdesi Qoja Ahmet Iasaýi kesenesine aparyp jerlengenshe, kóktem shyǵyp jer aiaǵy keńeigen ýaqytqa deiin el-jurt bidiń denesin osy jerde saqtaǵan eken.
Sóreden sál qashyqta Edige bi daý-janjalda bilik aitqan, tórelik etken, joryq aldynda jaýyngerlerge bata bergen tuǵyr-tas tur. El aǵasy Jabai Musabaev sol tasqa shyǵyp saparshylarǵa aq batasyn berdi.
Esimi el jadynda saqtalǵan babalaryn ulyqtap júrgen urpaqtary, el arasynda asqan kóregendigimen tanylǵan, qara sýdy teris aǵyzatyn qasietke ie tylsym kúsh iesi bolǵan Aidaboldan shyqqan asyl áýlie Qaraman abyzdyń ǵumyr keshken mekeninde bolyp, duǵa baǵyshtady.Sondai qasiet boiyna daryǵan darhan dalanyń taǵy bir perzenti Qudaibergen Botanulynyń beiitine «Áýmin!» - dep bet sipady. Túieni shóktirmei-aq bir attap minetin alyp deneli Qudaibergendi el arasynda «Mástek abyz» dep atap ketken eken.
Sapardyń bul kúni Buqar jyraýdyń kesenesine táý etýmen aiaqtaldy. Saiahatshylar jyraý atyndaǵy murajaimen tanysty. Buqar jyraýdyń urpaqtary as berip, quran baǵyshtady.
Sapardyń besinshi kúninde saiahatshylar Qanysh Sátbaev dúniege kelgen Teńdik aýylyna bet aldy. Tús aýa Airyq qystaýyna túsip sýsyndaǵan ekspeditsiia múshelerin aǵaiyndy úsh jigit qarsy aldy. Bir shańyraq astynda úsh abysyn tatý-tátti ǵumyr keship otyr. Qazaqtyń ulttyq salt-dástúriniń qalpyn buzbai saqtap otyrǵan aǵaiyndylarda at kóp, abysyndarda as kóp. Berekeli shańyraqtan qymyz iship shól basqan top Sátbai Shótikulynyń juraǵattary jerlengen qorymǵa soǵyp, marqumdar rýhyna quran baǵyshtady. Bul ziratta uly akademiktiń ákesi Imantai jerlengen.
Budan ári «Imantai qorasy» dep atalatyn jazyqta tóbe basynda ornatylǵan belgitasqa buryldy. Alystan menmundalaityn bul belgitas urpaq jadyna máńgilik eskertkish. Sebebi bunda «Qanysh Sátbaevtiń dúniege kelgen jeri» ekendigi jazylǵan. Attylar aldaǵy jyly 120 jyldyq mereitoiy kele jatqan Alashtyń birtýar ulyna jasalar qurmet te erekshe bolar degen senimmen attandy.
Akademik aýyly – qazirgi Teńdik aýylynyń syrtyndaǵy qabirstanǵa da arnaiy burylǵan ekspeditsiia osy qorymda jerlengen Qarjas rýynan shyqqan ataqty bi Shorman Kúshikulynyń úlken uly Musa Shormanov rýhyna duǵa baǵyshtady. Musa myrza Baianaýyl syrtqy okrýginiń aǵa sultany bolǵan. Ol Baianaýylda tuńǵysh meshit saldyrǵan ári bi, ári sheshen.
Aýylǵa jetken serilerdi aýyl aqsaqaly Serik Aýtaev bastaǵan onnan asa salt atty aýyl azamattary qarsy aldy. Aq jaýlyqty analarymyzdyń shashý, qoshemetine bólengen top akademik atyndaǵy mektepke tústi. Ekspeditsiia basshysy Oral Sartaev pen Aldamjar Altynbek Uly Otan soǵysynda mert bolǵan bozdaqtarǵa arnalǵan eskertkishke gúl shoqtaryn qoidy. Merekelik keshke ulasqan ulaǵatty shara, akademik mýzeiin aralaýmen jalǵasty.
Aýyl aqsaqaly Serik Aýtaev qadirli meimandardyń aldynda nemeresin tuńǵysh ret atqa otyrǵyzyp, qazaqtyń «Ashamaiǵa mingizý» dástúrin dáriptedi. Ulttyq oiyndar da nazarǵa usynylyp, aýyl azamattary teńge alý saiysyna tústi.
Teńdik aýlynyń Kókdombaq bólimshesinde túnegen saiahatshylar altynshy sapar kúni Máshhúr Júsip Kópeev kesenesine baǵyt aldy. Jolda Úkibai bi Naizabekulynyń mazaryna toqtap, quran baǵyshtady. Úkibai bi 1833 jyly Baianaýyl okrýginiń quramyna kiretin Satylǵan-Altyntory bolysynyń basshysy bolyp sailanǵan aýzy dýaly sheshen. 1839 jyly Batys Sibir general-gýbernatorynyń jarlyǵy boiynsha Kenesary Qasymuly bastaǵan qazaq halqynyń ult-azattyq qozǵalysyna qatysqan bolystar ydyratylyp, basqa bolystarǵa taratylyp berildi. Bul iske Úkibai aralasyp, Satylǵan-Altyntory bolysyn ydyratpai aman alyp qalǵan. Sózge tapqyr, ot aýyzdy, oraq tildi sheshen bidi Shoń bi qadyr tutqan eken.
Úkibai bi mazaryn artqa tastap ilgeri júrgen salt atty saiahatshylarǵa Úshtaǵan taýy» «Joldaryń bolsyn!» - dep turǵandai boldy. Jigitter oshaqtyń úsh butyndai, taǵanyń úsh emshegindei áser qaldyrǵan Úshtaǵan taýynyń eteginde turyp úsh júz ben úsh jurtynyń bereke-birligin tiledi.
Jańajol aýylyna jetken saiahatshylar Máshhúr Júsip meshitinde bolyp, quran oqydy. Artynsha Máshhúr Júsip Kópeev mektebiniń oqýshylarymen kezdesti. Jetkinshekter óz ónerlerin kórsetti. Oqýshylar salt atty serilerdi «Atameken» ánin shyrqap turyp shyǵaryp saldy. Ekspeditsiia músheleri osy aýylda turatyn Máshhúr atanyń úlken uly Muhamed-Sharapidenniń qyzy búginde 89 jasqa tolǵan Zaraýha anamyzben júzdesip, batasyn aldy.
Eskeldi basynda aqyn, filosof, shejireshi, halyq aýyz ádebietin jinaqtaýshy, etnograf Máshhúr Júsip arýaǵyna baǵyshtap qurbandyq shaldy. Taǵy bir qyzyq jait: Eskeldige barar jolda Ramazan Adambekov astyndaǵy «Sary» arǵymaǵyn basqa atpen alastyryp jetekke alǵan bolytyn. Kesenege jetken soń aiaǵyn tusamystap qoia bergen. Biraz ýaqyttan keiin barlyq top músheleri sýretke túsetin bolyp attarymen qosa jinaqtala bastaǵan. Aqyldysyn qarańyz, shetkeri baryp qatarlasa tura qalǵan ózge attardyń qasyna baǵanaǵy «Sary» da «Meni nege qaldyryp barasyńdar» degendei sapqa keshigip baryp qosylǵan sarbazdai kimelep kelip tura qaldy. Esti janýardyń kóńil súisindirer qylyǵyna saparshylar máz bolysyp qaldy.
Sapardyń jetinshi kúninde seriler Sultanmahmut Toraiǵyrov aýylyna jol tartty.Sultanmahmut Toraiǵyrov aýylynyń mańynda ornalasqan el ishinde Ábjalap áýlie atanǵan Jumatai Tyshqanbaiulynyń beiitine aialdap, quran baǵyshtady. Áýlie atanǵan Jumatai aýrý-syrqaý jandarǵa, músápir, kedei-kepshikke qamqor bolǵan jan. Máshhúr Júsip Kópeevpen asa syilas bolǵan. El ishinde Máshhúr ataǵa: «Seniń deneń shirimeidi, meniń denem jerde qalmaidy» – depti – delinetin ańyzdar keń taralǵan.
Aldaǵy jyly 125 jyldyq mereitoiy kele jatqan alashtyń arda aqyny, nebári 27 jyl ǵumyr keshken Sultanmahmut Toraiǵyrov aýylynda bolyp, aqyn atyndaǵy murajaimen tanysty. Shoń bi meshitinde boldy. Qarańǵy qazaq kógine órmelep shyǵyp kún bolǵan aqynnyń kesenesinde arnaiy quran baǵyshtady.
Budan ári Toraiǵyr jáne Jasybai kólderin jaǵalai júrip Arǵyn taipasynyń Básentin rýyshyqqan Jasybai batyr Ómirulynyń (shamamen 1716-1741 jyldary ómir súrgen)beiitinde boldy.Jasybai Baianaýyl óńirin qalmaqtardan azat etýde úlken erlik kórsetken batyr.
Bir aptaǵa sozylǵan salt atty saiahat Baianaýylǵa kelip jetip, óńirimizdegi erekshe tabiǵi eskertkish «Kempirtasqa» toqtady. Kelesi kúni Baianaýyl aýdanyna resimi is-saparmen kelgen Pavlodar oblysynyń ákimi Bolat Baqaýovqa ekspeditsiia basshysy jáne ideia avtory, oblystyq máslihat depýtaty Oral Sartaev osynaý sharanyń máni men mańyzyn jáne maqsatyn aityp ótti. «Bul tek atpen júrip ótý sapary emes. Toqtaǵan ár aýylda mádeni-sporttyq is-sharalar ótti. Baianaýyldan shyqqan uly tulǵalarǵa taǵzym ettik. Sapar barysynda, «Bulaq kórseń kózin ash», – degendei jas talanttardy taptyq. Jańajol aýylynda bolǵanymyzda 4-5 mektep oqýshysy at ústinde túrli triýkter jasaǵan Baqytjan Júnisovke qyzyǵyp, ózderi de úirengisi keletinin aitty. Biz olarǵa kúzde keletinimizge ýáde ettik. Sol ýaqytqa deiin olardy dene shynyqtyrý pániniń muǵalimi úiretetin boldy. Mirjaqyp babamyz «Oian, qazaq!» – dep uran salyp edi. Biz de qalǵyp ketken qazaqty oiataiyq dep niet ettik. Qazir mal baqsa da, dalaǵa shyqsa da kólik minedi. Atqa minetin jastar azaiyp barady. Qazaq attan túspeýi kerek. Atalarymyz «Atqa minbegen taqqa da minbeidi» – dep beker aitpaǵan ǵoi» – dedi Oral Rahmashuly.
Sondai-aq Oral Rahmashuly bastamany qoldaǵan aýdan ákimi Orazgeldi Qaiyrgeldinov pen «Nur Otan» partiiasy Baianaýyl aýdandyq filialy tóraǵasynyń orynbasary Raýan Jantelievke, sapardyń basynan aiaǵyna deiin at ústinde júrgen ekspeditsiia músheleri aýdandyq máslihat depýtaty Aldamjar Altynbekke, Jaiaý Musa aýylynyń turǵyny Ramazan Adambekovke, Jumat Shanin aýylynyń turǵyndary atbegi, qusbegi, palýan Baqytjan Júnisov pen qolóner sheberi, «Maqai seri» atanǵan Maqsutbek Kópjasarovqa, jas ta bolsa ór minezdi bolyp ósip kele jatqan Saiat Sarbasov pen osynaý sapar úshin Almaty qalasynan arnaiy kelgen «Ulan» balalar basylymynyń tilshisi Asylan Tilegenge jáne Baianaýyl aýdanynyń birqatar ultjandy azamattaryna alǵys bildirdi.
«Ulylarǵa taǵzym – urpaqqa amanat» salt attylar sapary alǵash ret uiymdastyrylǵanyna qaramastan óskeleń urpaqqa úlgi, ónege. Ár aýylda bolǵan sapar saiyn jalqyǵa, ulttyq ónerge, ulttyq sportqa degen qyzyǵýshylyǵy oianǵan jastar kóptep kezdesti. Sol jas óskinderdiń azamat bolyp qalyptasýyna jol ashar osyndai aýqymdy shara áli de jalǵasyn tabatyn bolady.
P.S: Bir aptalyq saiahat aiaqtalyp, baiaǵy kúibeń tirshiliktiń arnasyna qaita túsýge asa zaýqymyz soqpai, «Qairan seri babalar! Sal dáýrenniń qadir-qasietin tómendetpei, saýyq quryp, has ónerimizdi saqtap júrgen ekensińder ǵoi» – dep, at ústinde ótken qyzyqty sátterdi kóz aldymyzdan ótkizdik taǵy. Qosh aitysyp, qol bulǵap kete bardyq. Senimdi serigimiz bolyp, jolda qaldyrmaǵan «qanattarymyzdy» mekenine aparyp tastadyq. Jaiaý Musa aýylynan qatar shyqqan Aldabergen Altynbek pen Ramazan Adambekovtyń da attary juptasyp qaitty. Aýyl shetine jetken soń Eskeldide esti qylyq tanytqan «Sarynyń» noqtasyn sypytyp jailaýyna aidap jibergisi kelgen iesi. Arǵymaq bolsa, bir apta saparlas bolǵan Aldamjar aǵanyń arǵymaǵynyń sońynan qalmai aýylǵa biraq kirdi, qoraǵa biraq endi. Tap bizdiń de bir-birimizdi qimai, zorǵa qoshtasqanymyz sekildi.
Elaman QABDILÁShIM,
Pavlodar oblysy, Baianaýyl aýdany.
Ult portaly "Ulylarǵa taǵzym – urpaqqa amanat" ekspeditsiiasy týraly tsikldi aqparattardy bastalǵan kúnen bastap aiaqtalǵan kúnge deiin oqyrman nazaryna usynyp keldi.
Uqsas jazbalar:
