Пәкістанда 17 жастағы TikTok жұлдызы Сана Юсаф туған күнін атап, әлеуметтік желіге соңғы видеосын жариялағаннан кейін бірнеше сағат өткен соң өз үйінде атып өлтірілді. Қайғылы оқиға ел астанасы Исламабадта болған, деп хабарлайды ult.kz.
Сана Юсаф әлеуметтік желіде миллионнан астам оқырманы бар танымал контент авторы болған. Ол TikTok-та сән, сұлулық тақырыптарындағы видеолар жариялап, туған өлкесі Читралдың дәстүрлі мәдениеті мен ұлттық киімдерін насихаттаған. Сонымен қатар қыздардың білім алуын қолдайтын жазбаларымен де танылған.
Қайтыс боларынан бірнеше сағат бұрын туған күнін атап өткен
Сана 2025 жылғы 2 маусымда 17 жасқа толған. Сол күні ол достары және жақындарымен бірге туған күнін атап, торт кесіп жатқан видеосын әлеуметтік желіге жариялаған. Бұл оның өміріндегі соңғы жарияланымдарының бірі болды.
Алайда бірнеше сағаттан кейін қыздың үйіне қарулы адам кіріп, оған оқ атқан. Полицияның мәліметінше, Сана кеуде тұсынан екі оқ жарақатын алып, оқиға орнында көз жұмған.
Күдікті 20 сағат ішінде ұсталды
Қылмысқа күдікті ретінде 22 жастағы Умар Хаят ұсталған. Полиция оны қылмыстан кейін шамамен 20 сағат ішінде Фейсалабад қаласында қолға түсірген. Тергеу барысында полиция бейнебақылау камераларының жазбаларын, телефон деректерін және басқа да дәлелдерді пайдаланған.
Тергеу нұсқасы бойынша, күдікті Санаға бірнеше рет хабарласып, онымен кездесуге тырысқан. Қыз оның ұсыныстарын қабылдамаған. Полиция өкілдері қылмысты бірнеше рет қабылданбаған ұсыныстармен байланыстырады.
Кейін сотта тергеуші күдіктінің магистрат алдында қылмысты мойындағанын хабарлаған. Сондай-ақ оның саусақ іздері Сана тұрған үйдегі есік әйнегінен алынған іздермен сәйкес келгені айтылды.
Күдікті өлім жазасына кесілді
2026 жылғы мамырда Исламабад соты Умар Хаятты Сана Юсафты өлтіргені үшін өлім жазасына кесті. Сот оған ұрланған мүлікті сақтағаны үшін қосымша бір жыл бас бостандығынан айыру жазасын және айыппұл тағайындаған.
Сананың өлімі Пәкістанда үлкен қоғамдық резонанс тудырды. Оның соңғы туған күн видеосына кейін мыңдаған адам көңіл айту пікірлерін қалдырған. Қайғылы оқиғадан кейін оның әлеуметтік желідегі оқырмандары да күрт көбейген.
Сана Юсафтың туған күнін қуанышпен атап, бірнеше сағаттан кейін өмірінен айырылуы әлеуметтік желі қолданушыларын қатты алаңдатқан. Оның соңғы видеосы қазір марқұмның қысқа ғұмырының соңғы сәттерін көрсететін кадр ретінде қайта таралып жатыр.
