Ресейдің Коледино қалашығындағы Wildberries қоймаларына жасалған кезекті шабуыл қазақстандық кәсіпкерге қымбатқа түсті. Оқиға салдарынан Айдархан Қасымбектің 150 млн теңге шамасындағы тауары өртеніп кеткен, деп хабарлайды ult.kz.
Кәсіпкер бұл туралы әлеуметтік желідегі парақшасында хабарлады. Оның айтуынша, бұған дейін шабуылға ұшыраған қоймаларда қазақстандық тауар көлемі аз болған. Ал негізгі қор Колединодағы қоймада сақталған.
«Бұған дейін жанған қоймаларда біздің тауарларымыз өте аз болатын. Негізгі тауарларымыз Колединодағы қоймада орналасқан еді. Бұл ақпаратты қабылдау қиын», – деді кәсіпкер.
Айдархан Қасымбектің айтуынша, шабуылдар басталғанға дейін аталған қоймадағы тауарларының өзіндік құны шамамен 400 млн теңге болған. Кейін ол тауардың бір бөлігін жеңілдікпен жедел сатып жіберген.
«Қазір 150 миллион ғана қалды. Бұған дейінгі тауардың бәрін жеңілдікпен тездетіп сатып жібердік», – деді ол.
Кәсіпкер болған жағдайды ауыр қабылдағанымен, сабырға шақырған.
Wildberries қоймаларына қатысты жағдай қазақстандық сатушылар арасында бұған дейін де алаңдаушылық туғызған. Қазақстанның Сауда және интеграция министрлігі маркетплейс төңірегіндегі жағдай бойынша ақпарат жинап жатқанын мәлімдеген.
Мамандар мұндай оқиғалар шетелдік қоймаларға тәуелді қазақстандық кәсіпкерлер үшін жеткізу тізбегі мен тауар қауіпсіздігіне қатысты тәуекелдерді күшейтетінін атап өткен.
Бір ғана шабуылдың салдарынан қазақстандық кәсіпкердің 150 млн теңгелік тауарының өртенуі – шетелдегі қоймаларға тәуелді отандық сатушылар үшін үлкен қауіптің барын көрсетеді.
