Ресейдің Электросталь қаласындағы Wildberries қоймасында болған ірі өрттен кейін компания зардап шеккен сатушыларға, оның ішінде қазақстандық кәсіпкерлерге өтемақы төлеуді бастады. Алғашқы төлемдер ең алдымен шағын бизнес өкілдеріне бағытталуда, деп хабарлайды ult.kz.
Компанияның мәліметінше, бүгінде платформада Қазақстаннан тіркелген 120 мыңнан астам сатушы бар. Басымдық қолдауды көбірек қажет ететін шағын кәсіпкерлерге берілген. Мұндай сатушылардың саны 88 мыңнан асады.
Wildberries өкілдерінің айтуынша, өтемақы қаражаты сатушылардың жеке балансына бір тәулік ішінде аударылады.
Сонымен қатар компания қоймадан тауарларды шығару қызметінің жұмысы алдағы бір тәулікте толық қалпына келетінін хабарлады. Қазір негізгі күш логистикалық процестерді тұрақтандыруға және тауарларды қоймалар арасында тиімді қайта бөлуге жұмылдырылған.
«Біздің басты міндетіміз – серіктестерімізге қолдау көрсету. Қазір барлық ұйымдастыру жұмыстары тауарларды қоймалар арасында тиімді қайта орналастыруға және кәсіпкерлердің тұрақты жұмысын қамтамасыз етуге бағытталған. Сонымен қатар сатып алушылардың тапсырыстарын уақытылы жеткізу де негізгі басымдықтардың бірі болып қала береді», – деп мәлімдеді компания.
