Украинаның Сыртқы істер министрі Андрей Сибига Қазақстан Президенті Қасым-Жомарт Тоқаевтың Ресей мен Украина арасындағы қақтығысты тоқтатып, дипломатиялық келіссөздерге оралу туралы мәлімдемесіне пікір білдірді. Ол бұл туралы X әлеуметтік желісіндегі парақшасында жазды, деп хабарлайды ult.kz.
Сибига Тоқаевтың Омбыда Ресей президенті Владимир Путинмен кездесу кезінде айтқан ұсынысын «реалистік, дер кезінде жасалған және дана мәлімдеме» деп бағалады.
«Президент Қасым-Жомарт Тоқаевтың Путинге соғысты тоқтататын уақыт келгенін айтқан үндеуін жоғары бағалаймыз. Бұл – реалистік, дер кезінде жасалған әрі дана мәлімдеме. Украина қазіргі шептерде ұрыс қимылдарын тоқтатып, дипломатиялық жолға көшуді ұсынды, алайда Кремль бейбітшілікке бастайтын бұл жолды әлі де қабылдамай отыр», – деп жазды Украина сыртқы саяси ведомствосының басшысы.
Еске салайық, бұған дейін Қасым-Жомарт Тоқаев Омбыдағы кездесу барысында Ресей мен Украина арасындағы қақтығысты тоқтатып, «Стамбұл формуласы 2.0» аясындағы келіссөздерге қайта оралуды ұсынған болатын.
