Қостанай қаласы әкімдігінің Білім бөлімі басшысы бюджет қаражатын жымқырды деген күдікпен ұсталды. Бұл туралы облыстық прокуратура хабарлады, деп хабарлайды ult.kz.
Ведомство мәліметінше, Қостанай облысы бойынша ҰҚК департаментінің сотқа дейінгі тергеп-тексеру басқармасы білім саласына қатысты лауазымды тұлғаларға байланысты қылмыстық істі тергеп жатыр.
Күдіктілер өзге адамдармен алдын ала сөз байласып, бөлімге қарасты мектептерге бөлінген бюджет қаражатын заңсыз иемденді деген күдікке ілінген.
1 маусым күні күдіктінің тұрғылықты жері мен жұмыс орнында тінту жүргізілген. Сол күні Қостанай қаласы әкімдігінің Білім бөлімі басшысы Г.А. Ұразбаева ҚР Қылмыстық кодексінің 190-бабы 3-бөлігі бойынша күдікке ілініп, уақытша ұстау тәртібімен қамауға алынған.
Қазіргі уақытта тергеу амалдары жалғасып жатыр. Құзырлы органдар Қылмыстық-процестік кодекс талаптарына сәйкес өзге ақпарат жарияланбайтынын мәлімдеді.
