2026 жылы Қазақстанның автомобиль нарығы соңғы екі жылдағы рекордтық сатылымнан кейін де жоғары қарқынын сақтап қалды. Жыл басында сұраныс біршама бәсеңдегенімен, жазға қарай нарық қайта өсім көрсетіп, алғашқы алты айдың қорытындысында ресми дилерлер 105 886 жаңа жеңіл және коммерциялық көлік сатты. Бұл өткен жылдың сәйкес кезеңімен салыстырғанда 0,9 пайызға жоғары көрсеткіш, деп хабарлайды ult.kz.
Ең көп сатылған брендтер мен модельдер
2026 жылдың алғашқы жартыжылдығында ең көп сатылған брендтер рейтингінде өзгеріс болды. Chevroletқайтадан бірінші орынға көтеріліп, ұзақ уақыт көш бастап келген Hyundai брендін артта қалдырды.
2026 жылдың алғашқы жартыжылдығындағы ТОП-10 автокөлік бренді:
Chevrolet - 17 586 көлік (+32,2%)
Hyundai - 17 247 (-28,6%)
Kia - 12 332 (+8,9%)
Changan - 9 471 (+89,2%)
Chery - 8 143 (+11,3%)
Haval - 6 730 (+16,2%)
Jetour - 5 774 (-20,3%)
JAC - 4 745 (+0,4%)
Toyota - 3 997 (-12,3%)
Geely - 2 926 (-44,5%)
Ең көп сатылған модель бұрынғысынша Chevrolet Cobalt болды. Бағасы шамамен 6,7 миллион теңгеденбасталатын бұл седан қолжетімділігі мен сенімділігі арқасында жеке сатып алушылар арасында да, корпоративтік автопарктерде де сұранысқа ие.
Ең көп сатылған 10 модель:
Chevrolet Cobalt - 16 370 дана;
Hyundai Tucson - 8 601;
Kia Sportage - 5 200;
Changan CS55 Plus - 4 017;
Hyundai Mufasa - 3 119;
Haval Jolion - 2 836;
Changan CS35 Max - 2 706;
Chery Tiggo 2 - 2 585;
Haval M6 - 2 396;
Chery Tiggo 7 - 2 393.
Қытайлық брендтердің ықпалы күшейді
2026 жылы қытайлық автокөлік өндірушілер Қазақстан нарығындағы позициясын толық нығайтты. Қазіргі таңда олардың үлесіне нарықтың шамамен 39 пайызы тиесілі.
Мұндай нәтижеге бірнеше фактор әсер етті:
Жергілікті өндіріс. Қазақстанда ең көп сатылатын модельдердің басым бөлігі ел ішінде құрастырылады. Алматыдағы жаңа мультибрендті зауыттардың іске қосылуы Chery Tiggo 2, Changan CS55 Plus секілді модельдерді жергілікті жерде шығаруға мүмкіндік берді.
Заманауи жабдықталуы. Қытайлық көліктер салыстырмалы түрде қолжетімді бағаға кең функционал ұсынады.
Модельдердің жиі жаңаруы. Қытайлық брендтер жаңа үлгілерді бәсекелестеріне қарағанда жиірек шығарып, тұтынушылардың қызығушылығын сақтап келеді.
Электромобильдерге жеңілдік аяқталды
2026 жылдың 1 қаңтарынан бастап Қазақстанда электромобильдерді әкелуге қатысты бұрынғы жеңілдіктер тоқтатылды.
Енді жеке тұлғалар үшін екі түрлі рәсім қарастырылған:
ЕАЭО тәртібі бойынша:
15% кедендік баж;
16% қосылған құн салығы;
жалпы салық жүктемесі көлік құнының шамамен 31 пайызын құрайды.
Бұл рәсімнің артықшылығы - көлікті кейін Еуразиялық экономикалық одақ елдерінде еркін сатуға болады.
ДСҰ тәртібі бойынша:
кедендік баж алынбайды;
тек 16 пайыз ҚҚС төленеді.
Алайда мұндай көлікті Қазақстаннан тыс жерге шығарып, қайта сатуға заңмен шектеу қойылған.
Сарапшылардың пікірінше, жаңа талаптардың әсерінен электромобиль бағасы 30-40 пайызға дейін қымбаттауы мүмкін. Соған қарамастан толық электрлі көлік иелері бұрынғыдай көлік салығы мен утильалымнан босатылған.
Гибридтерге қызығушылық артып келеді
Қазақстандықтар толық электрлі көліктерден гөрі гибридтер мен ұзартылған жүріс қорына ие модельлерді жиі таңдай бастады.
2026 жылдың алғашқы төрт айында жаңа энергия көздерін пайдаланатын көліктердің (NEV) сатылымы бес есеге жуық өсті.
Сарапшылар мұны Қазақстанның климаты, алыс қашықтықтар және қуаттау станцияларының жеткіліксіздігімен байланыстырады. Осындай жағдайда гибридтер күнделікті пайдалануға қолайлырақ саналады.
Бұл сегментте BYD Song Plus DM-i моделі көш бастап тұр.
Жыл соңына болжам
Мамандардың бағалауынша, 2026 жылдың қорытындысында Қазақстандағы автокөлік өндірісі 209 мың данағажетіп, өткен жылмен салыстырғанда 22 пайызға өседі.
Сонымен қатар:
дилерлер арасындағы бәсеке күшейеді;
сатып алушыларды тарту үшін тиімді несие бағдарламалары мен сервистік қызметтер ұсынылады;
Chevrolet пен Hyundai көшбасшылық орнын сақтап қалғанымен, Changan мен Chery нарықтағы үлесін ұлғайтуды жалғастырады.
Көлік сатып алғанда неге ресми дилерді таңдаған дұрыс?
Сарапшылар бірнеше себепке байланысты көлікті ресми дилерлерден алуға кеңес береді.
Біріншіден, сатып алушы зауыт кепілдігі мен сервистік қызметке ие болады.
Екіншіден, Қазақстан нарығына арналған көліктер климаттық жағдайларға бейімделіп шығарылады. Олар жылыту жүйесі мен қосымша қорғаныс элементтерімен жабдықталады.
Үшіншіден, жаңа кедендік талаптарға байланысты бейресми жолмен әкелінген көліктерді кейін қайта сату кезінде құқықтық мәселелер туындауы мүмкін.
Сондықтан 2026 жылы көлік таңдағанда оның бағасы мен дизайнына ғана емес, Қазақстанда құрастырылатынына, қосалқы бөлшектерінің қолжетімділігіне және сервистік қолдауына да назар аудару маңызды.
