Қазақстан құрамасының қоржынына XX жазғы Азия ойындарында бесінші алтын медаль түсті. ММА шебері Еркінғали Бүркіталин Азия ойындарының чемпионы атанды, деп хабарлайды ult.kz.
Жапонияның Нагоя қаласындағы Инаэ спорт орталығында аралас жекпе-жектен (ММА) финалдық кездесулер өтіп жатыр.
77 келіге дейінгі салмақта дәстүрлі стиль бойынша өнер көрсеткен Еркінғали Бүркіталин финалда Бахрейн өкілі Мұхаммед Нәбиевпен кездесіп, 3:0 есебімен жеңіске жетті.
Айта кетейік, ММА жазғы Азия ойындарының бағдарламасына тарихта алғаш рет Жапонияда енгізілді.
Осылайша, Қазақстан құрамасының еншісіндегі алтын медаль саны 5-ке жетті.
XX жазғы Азия ойындары 4 қазанға дейін жалғасады. Қазақстан құрамасы сапында 558 спортшы бар. Олар жарыстың 35 спорт түрінен жүлдеге таласып жатыр.
