Павлодар облысында студент қыздың өліміне қатысты сотқа дейінгі тергеу басталды. Іс ҚР Қылмыстық кодексінің 105-бабы бойынша қаралуда, деп хабарлайды "Ұлт ақпарат" Pavlodarnews.kz сайтына сілтеме жасап.
Екібастұзда осы қаладағы колледждердің бірінде оқитын қыз сегізінші қабаттағы пәтердің терезесінен секіріп, қаза тапты.
«Аталған фактіге қатысты ҚР ҚК-нің 105-бабы бойынша сотқа дейінгі тергеу басталды. ҚР ҚПК 201-бабына сәйкес өзге ақпарат тергеу мүддесінде орай таратылмайды», - деп атап өтті өңірлік полиция департаментінен.
ҚР ҚК 105-бабы – «Адамды өзін-өзі өлтіруге дейін жеткізу немесе жәбірленушіні қорқыту, оған қатыгездікпен қарау немесе оның адамдық қадір-қасиетін жүйелі түрде қорлау арқылы өзін-өзі өлтіруге оқталу». Кінәлі адам үш жылға дейін бас бостандығынан шектелуі немесе айырылуы мүмкін.
Қаза тапқан 16 жастағы қыз Екібастұз қаласының академик Қ.И. Сәтбаев атындағы инженерлік-техникалық институтында 1-курста оқыған. Колледждің ақпаратынша, ол 9-сыныптан кейін «станциялар мен қосалқы станциялардың электр жабдықтары» мамандығының күндізгі бөліміне оқуға түскен.
